diak koman kayat ti agsurat iti daniw
ta mamatiak a saan a mangted ti ragsak
no di ket soledad--
kayatko a masaen ti tinapay, ilallay
ti maladaga ket awitek ti bukod a kalgaw
ngem nakurenren rupak ket dagiti dakulap
nakersang iti amin a panawen panagani
nupay iwaneswes ti angin ti nakasegged
a bombilia iti poste ita a rabii, magnaak
a sakasaka kadagiti di pay naasak ken naarado
a pagtatalonan. kunak: maarikap ti biag
a kas iti maysa a sugat ket ti law-ang a napno
kadagiti bituen, matnagda iti daga a kas
balikas ket itdenda ti nalidem nga agsapa--
lumtuadda iti panunot a kas da la danum
a mangdam-eg dagiti natikagan a kinelleng,
agpakadada ngem umay ti sabali a bigat.
agdawidaw ti basar iti makapleng a riaw
ti pusa, makapatigerger ti apros ti angin
iti panawen ti panagrururos, mangngeg
ti panagngerngernger ti dalluyon a mangsabuag
ti aplaya; ngem makasalibukag iti rikna ti angot
ti menta iti igid ti karayan, agdisso ti raya
ti init iti abaga a paginanaan ti naamo a billit
a nagkayabkab manipud iti vidro ti tawa.
ngem awan makapagsasaraip kadagiti nasinasina
a balikas no di laeng ti rabii a napno't misterio
ket lapdanna ti panagtedted ti lua, wenno adda
ibagasan ti nalabbaga ken maris ube nga erbia,
wenno sabong a mapidut iti tengnga ti aldaw
ta iduronna laeng a yadayo dagiti nasam-it
a balikas, dumalan kadagiti urat, agayus
iti dara, awaten ti puso, mayula a rummuar
iti bibig--makatikaw pannakaisawangna
ta napait kalpasan a maramanan.
ammok a matunaw no inawnawko iti danum
ti sangapiraso a niebe a pekkel dagiti
dakulapko a kas met iti panagtapaw ti bulong
ti oliba ngem diak panunoten a saanko
a kabaelan nga iturong ti gasatko.
diak koman kayat ti agsurat kadagiti daniw
ngem ti pluma a petpet dagiti ramayko
agtremulo iti panaggitebgiteb ti pusok
isut' gapuna a diakon agsubli iti naggapuak...
.
.
.
.
.
diak koman kayat ti agsurat
rudy ram. rumbaoa
samiwengkenayatnirudy.blogspot.com
ene.2o14
[nabulod ti ladawan a nausar]
No comments:
Post a Comment