NO KOMA [Iti Daytoy Nga Aldaw a Pananglagip ti Panagtaom]

"saan a maibasar ti kinapintas a makita iti rupa, isu ketdi ti silaw dagiti puso..."

.

.

.

.

.

ita nga aldaw

lun. 28 agosto 2o23

maui

No koma masagutanka

iti diamante tunggal agarubos

lua a siak ti puonna,

No koma masagutanka

iti kurindon tunggal maidalebak

yawatmot' ima tapno bumangonak,

No koma masagutanka

iti rubi tunggal masaktak

riknam a sika lat' makarikna,

No koma masagutanka

iti perlas gapu ti dungngo

ken ayat nga impariknam--

Adu koman kinabaknangmo, Ina,

ta mayarig kaaduda iti kalawa ti baybay

nga awan pagnguddoanna, wenno kangato

dagiti bantay a tumukno iti ruangan ti langit

a sadiay napno ti samiweng dagiti angheles

ken makipinnaris iti rimat dagiti bituen

ti naasi ken managayat unay a pusom;

Ngem awan ti perlas, awan rubi,

kurindon wenno diamantek nga isagutko

ket ammok nga ammom nga awananak

kadagitoy a banag ta siak ti nanumo--

ti laeng kinaasinom kaniak ken no asinoak kenka

ti maipagtangsitko ta awitkot' daram

nga agtartaray kadagiti urat ket dinto malibeg

ti siasinoman, ta siak, maysaak a namuli

kadagiti nagkaadu nga araapapyo ken ama.

Ikawesko nga agnanayon ti kinadungngom.

Agbalin a taraonko iti inaldaw ti ayat

ken pammategmo a damok a naraman

nga insubom kaniak idi masirayak ti lawag-

Bendisionannaka ti Dios iti agnanayon.

Agyamanak unay kenka, Ina.

Ay-ayatenka. Naragsak ken nagasat

A pananglagip iti aldaw ti panagtaom!

.

.

.

.

.

.

NO KOMA [Iti Daytoy Nga Aldaw a Pananglagip ti Panagtaom]

[Ken ni Adelindes]

Rudy Ram. Rumbaoa

samiwengkenayatnirudy.blogspot.com