Nagbayanggudawak iti adayo
ken nalawa a di masinunuo
nagkallautang ti riknak
iti rugi ti law-ang ingganat'
makita ti mata; nangngegkon idi
nga awan pay nagdaliasat
ti daytoy a kalsada- ti dalan
nga awan ungto ken pagsublianan.
Datayo ti padron nga imahe
ket dagiti ari isuda ti amo,
ti akto a pasamak ken kinapudno
saan a pangngarig ken panagdasig;
ta adda tiempo nga aggunaytayo
a nawaya iti entablado, agsublisubli
nga agparang tunggal maysa
iti kahon ti pannakalipat.
Anian a nagatiddog ti tiempo
a naited kadatayo ket agbanag
nga agnanayon ti agtaruptop
a lubong, no di agparang
ti nagan wenno pagilasinan;
ket no adda pagkurangan,
saantayton agsubli iti dati.
Ket iti rabaw ti lubong,
makitak dagiti nargaan
ti turogna, iti kapitakan,
makitak dagiti napapanaw
a kasla billit a nabuak
nga agtatayab kadagiti umokda:
no mayadu ti panagpanunot
ti kinaawan-kaeskenan
a pannakalipat, makitak laeng
dagiti pumusay ken di naipasngay.
Ngem daytoy ti kaduogan a posada
wenno pagdagusan a maawagan
ti lubong, daytoy ti paginanaan-pagtaengan
ti rabii ken aldaw: daytoy ti sobra
a padaya dagiti ginasut nga ari,
tanem a mayarig ti siled
ti hotel dagiti ginasut a politiko.
.
.
.
.
.
LUBONG
Rudy Ram. Rumbaoa
[nabulod ti ladawan a nausar]
#lubong #nagbayanggudaw #gangannaet #daliasat #padron #imahe #ari #pangngarig #panagdasig #nawaya #aggunay #entablado #pannakalipat #agtaruptop #nargaan #turog #pumusay #pagdagusan #kaduogan #posada #paginanaan #pagtaengan #padaya #siledtihotel #politiko
No comments:
Post a Comment