Awan dados.
Nakaar-arogante,
nakaam-ames
ti nagbalin a pagteng
Kasla nagbuyaak iti pelikula:
ti naglabas, ti agdama
ti main-inaw a ladawan
ti masakbayan.
Nagbanag ketdi
a pagkarnabalan
iti aglawlaw. Uray
ti musika, saan
a makaanay
ken makalinglingay
a denggen. Nakitak
ti arigna nisnis
a daradara
a pagan-anay
nga aruat
dagiti pada a makidaya
iti libre a sagut ti biag.
Nagdawatak iti kaasi
ti lubong, ngem patay
ti insubadna,
nupay mamatiak
iti agdama,
saanak a bangkay.
Ket apagapaman
a nangngegko
dagiti karasakas
ken arimpadek
nga umas-asideg kaniak,
mariknak a kasla
mabbualak iti nagtakderak;
ngem diak inkankano
no di naguray iti sumaruno
a mapasamak.
Diak naggunay ta mariknak
a nagtaeng ti pammati kaniak.
Apo, ammok a dinak baybay-an.
Sapulenka no dika mauray-
ti pusok aywan ken adda
iti pannarabaymo...
.
.
.
.
.
SINAPULKO
Rudy Ram. Rumbaoa
samiwengkenayatnirudy.blogspot.com
#ilokodaniw #sinapulko #samiweng #ayat #rudyramrumbaoa
[nabulod ti ladawan a nausar]
No comments:
Post a Comment