Kayatko met agbuya iti sabali
ngem awan sabali a mapili,
kasta met ti kontrabida.
Makauman a buyaen rupada
awan sa met mayat nga agartista
uray koma agparang a sinsinan bida,
wenno ti kalabanna a kontrabida.
Wen, kayatko met agbuya
iti baro ken sabali a makita
ta pudno unay a makauma
arigna ti agsublisubli a plaka.
Kayatko ti agbuya iti sabali
tapno malinglingay inawisko a sangaili
numuna ket naggapu't adayo nga ili
ken adda met maestoriana no agsubli.
Kuna ngarud daytoy sangsangaili:
"Diak kayat kanayon a kastoy, Kaili,
no mabalin adda sabali a mabuya
uray aksion, komedi, drama no isut' adda."
Pudno di mailinged kaririknak nga agbuya
ta kasano aya isu la nga isut' turongen estoria,
agdaydayamudom la ngarud pada a makakita
di pay agpagusto ti bida ken kontrabida!
.
.
.
.
.
MAKAUMA MET
Beinte Beinte Singko
Rudy Ram. Rumbaoa
#ilokodaniw #makaumamet #bida #kontrabida #agpabuya #estoria #isulaisu #samiweng #ayat #beintebeintesingko #rudyram.rumbaoa
[nabulod ti ladawan a nausar]
No comments:
Post a Comment