Ayat ti Maysa a Lakay

“Kanayon kadi a sarungkaram ni Nana?” dinamag ni Iddo. CNA ni Iddo iti maysa a long-term nursing care facility iti Maui. Certified Nurse Assistant wenno ti maawagan iti caregiver ken care partner.

Nagtung-ed ti lakay.

“Binigat? Saanka a mabannog nga agkaraumay ditoy?” pinerreng ni Iddo ti lakay.

Saan a simmungbat ti lakay.

Nadlaw ni Iddo nga inwaras ketdi ti lakay ti panagkitana iti lawlaw.

“Iti daytoy nga edadko, barok, mabannogak met ti ar-aramidek iti asawak. Ngem no ut-utobem, saanmin a bukod nga agasawa ti tiempo. Dumtengto ti kanito a lak-amek met ti kasasaad ni baket. No saan, umay ti orasmi nga agasawa ket kawitennakami ti kumpay ni patay, awan ti mabalinmi,” kinunana. “Mabang-aran ti riknak no kanayonko a makita ken serbian ni Petra.”

Dinayaw ni Iddo ti sungbat ti lakay. Ket pudno, kas met ken ni Lakay Mundo, mapasamakto kenkuana ti kasasaad ti lakay. Saanna a bukod ti amin a panawenna ken agbalinto met a kas kadagitoy a nataengan. “Am-ammonakay’ pay ngarud ni Nana?” dinamagna.

Nagwingiwing ti lakay, “Uray dinak am-ammon ni Petra, am-ammok pay laeng. Wen, isu pay lang daydi dinungdungngok nga asawa,” kasla di sumngaw dagiti balikas nga agaun iti bibigna. “Ammok a dinakon malasin gapu iti sakitna, ngem saan a dayta ti tubeng tapno baybay-ak metten. Ita ta adda pay a biag, kayatko a siak ti mangasikaso kenkuana.”

Napespes ti asi iti puso ni Iddo ngem ad-adda manen a rinaemna ti lakay. Ita, maawatannan no kasano ti rigat ken pateg ti maysa a nataengan nangruna no dagitoy ket mabilbilangen dagiti aldawda iti lubong, ken maibalayda iti saanda a bukod a pagtaengan...

.

.

.

.

.

*naadaw iti maysa a paset ti ababa a saritak

AYAT TI MAYSA A LAKAY

Rudy Ram. Rumbaoa

samiwengkenayatnirudy.blogspot.com

#putedasarita #ababaasarita #ayattimaysaalakay #iloko #iddo #lakaymundo #petra #certifiednurseassistant #carepartner #caregiver #longterm #nursingcarefacility #panagayat #panangipateg #asawa #samiweng #ayat #rudyramrumbaoa

[nabulod dagiti ladawan a nausar]