Sabong Ni Mirasol, 2o11

DAYDI a rabii ti kapatgan a sagutmo:

Pagngatangataak tinagikuak ti gundaway

Nagtalinaed ti pinnerreng dagiti mata

Natarusak ti ibagasan 'ta isemmo

Nagturongta iti sirok ti mangga

Nagiladta iti karuotan nga apagta

Binaludka kadagiti arakupko ket nariknak

Ti panagdalagudog ti barukongmo

Kas man adda mauyos a panagbabawi.

Idi damo, disintonado dagiti nalailo

Nga areng-eng ngem idi masurotakon

Ti taltaluntonek a desdes, limmukay

Dagiti nagsusuopak tapno magtengko

Ti pagnguddoan ti alimpatok--nayurit

Awan maaramidan ti kinalamiis ti rabii

Iti bara ken nagsasaruno a panagtedted

Ti ling-et iti bagi. Kas iti alimbubuyog,

Sepsepanna amin a diro nga adda iti sabong.

Naulimek iti aglawlaw kalpasan a nayibbet

Ti kararagsakan nga asug ti nagpatnag

Malaksid kadagiti kulintaba nga agtatayab

Iti lamolamo a tangatang ken sellag a bulan,

Nagmarka iti blusa ti maris nalabbaga a kapnekan

A sitatallugodka a nangyawat ti inannadam

A kinabaknang iti agtarawidwid ken mangaywan.

Inaldaw-aldaw nga inpalagip ti sayamuson

Dagtii sabong ti agadda santo agpukaw a banglo

Bayat nga agdisso ken agtayab dagiti alimbubuyog

Ti panagreggetda nga agsapul iti diro--aggiinnunada,

Nasayud ti panaglabas ti sangapulo a tawen

Iti panawen ti lam-ek ken kuaresma ngem kaskasdi

A nabaybay-an panagdakkelda iti minuyongan

Ti pannakaulilak gapu't pannakairisang ti biag...

.

.

.

.

.

SABONG NI MIRASOL, 2o11

[Erotiko a Daniw]

Rudy Ram. Rumbaoa

samiwengkenayatnirudy.blogspot.com

#sabong #mirasol #ilokodaniw #samiweng #ayat #rudyramrumbaoa

[Nabulod ti ladawan a nausar]