A Sika, Saanka Nga Agmaymaysa

Ninasnasak iti nadalus a lupot

ti tawa nga asideg ti indayonmo,

dita pagtuppuaran dagiti bituen

nga agrangrang iti tangatang

isuda't silnag nasipnget a lugar;

a sika, saanka nga agmaymaysa.

Agkinniak ket tuladek tao a narapis

a magna iti patag a kalsada, ditoy

ti pagdissoan ken pagguummongan

dagiti tumatayab, agkanta ken agsalada;

a sika, saanka nga agmaymaysa

nga agbaniaga iti papanam.

Ket iti pantok ti kangatoan a turod

sallukobannaka narukbos a kayo

tapno linongannaka, makainana ket

ti angin pug-awannaka inka mailibay

a sika, saanka nga agmaymaysa

iti lubong kaduanak dita sibay...

.

.

.

.

.

A SIKA, SAANKA NGA AGMAYMAYSA

Rudy Ram. Rumbaoa

samiwengkenayatnirudy.blogspot.com

#ilokodaniw #sika #saan #agmaymaysa #samiweng #ayat #rudyramrumbaoa

[Nabulod ti ladawan a nausar]