Insurom Kaniak

Silmotam ti bagik,

ikirasmo ti naibarikes

a lamminmo kaniak.

Seggedak ti riknam

agsinneggedta ti rikna.

Aronam ta aronak kenka.

Rubrobanta ti kinniras

agingga a mapataud ti bara---

agbalinak nga apuymo

iti kinalamiis ti rabii,

baluden takiagko

agkutkutiperper a di maipeksa

nga iliwmo---

idingpilkot' bibig iti mawaw

a bibigmo, patubbogenta

nga agparuar iti likido,

paglunitenta ti birri

a pinarnuay nabayagen

a pannakaulila, kayatko

nga agkan ti aminmo

agingga a mananamkot' maudi

a tedted sam-it ti diro.

Uray agkedkedka, uray

kunam a kaguranak

awanen maaramidmo ta

siak itan ti agbalin nga init

ti rabiim, suktak nakudrep

a silnag ti bulan, iti kasta,

nawaya ti rikna nga agtinnukma;

nga uray adda tubeng,

adda pakababalawak,

adda panagbabawi,

wenno maibusor iti nakemko,

wenno nakemmo gapu ta

addan nakabaludan ti puso,

gammatanta ti gundaway---

kenka a nagtamed ni Adan,

insurom kaniak ti nagbasol.

.

.

.

.

.

INSUROM KANIAK

Rudy Ram. Rumbaoa

samiwengkenayatnirudy.blogspot.com

#ilokodaniw #insuromkaniak #adan #agtamed #2011 #lamiis #silmotam #basol #init #bulan #samiweng #ayat #rudyramrumbaoa

[Nabulod ti ladawan a nausar]