Samiweng. Daniw. Sarita. Salaysay. Damdamag, Kdpy.
Showing posts with label AGPULLIKAWKA [A Kas iti Teggak]. Show all posts
Showing posts with label AGPULLIKAWKA [A Kas iti Teggak]. Show all posts

Oct 29, 2026

AGPULLIKAWKA [A Kas iti Teggak]



Ammok a nalipatamon ti naglabas
Ngem dimo koman lagipen pay
Saankan nga agsurat kaniak
Kas iti inaramidmo idi nga aguray

Rebbaem man amin a rangtay
Ken dagiti kalsada a pagdaliasatak
Ngem ti maysa a nadarat a dalan
Ibatim kaniak, idawatko; ilalaak.

Ket iti labes dagiti nalawa a taaw
Atiddog ken adayo ti pagkamangan
Ti kayo ti aruo innak ipakpakaasi
Bay-am, agpallayog iti aldaw ken rabii

Agpukaw man amin a kataltalonan
Marabnos kinabirhen ti kabakiran
Ngem dayta bassit a kayo ti aruo
Palubosam a dumakkel iti langit tumukno

Kadagiti amin nga innak ilalaen
Uray kunam a mabalin a tagikuaen
Ti rangrang ti init ken lawag ti bulan
Agkudrep, lamuten sipnget iti masakbayan

Agpullikawka a kas iti teggak
Ket panawannak iti nakana a liday
Ngem ti ayat, ti kakaisuna nga ayat;
Dawatek, ipalubos a mabati kaniak...
.
.
.
.
.
AGPULLIKAWKA [A Kas iti Teggak]
Rudy Ram. Rumbaoa
samiwengkenayatnirudy.blogspot.com

#itangaaldaw #ilokodaniw #agpullikaw #teggak #samiweng #ayat #rudyramrumbaoa

[Nabulod ti ladawan a nausar]