Aldaw ti Panagyaman

ALDAW TI PANAGYAMAN, sapay la koma ta agari ti kappia iti sangalubongan nangruna iti pagilian a Filipinas. Piman...

Wen, panagyaman iti Dios iti inpaayna a bendision. Panagyaman iti pamilia nangruna kadagiti nagannak, ta no saan a gapu iti ayatda, asinotay' koma ita? Panagyaman kadagiti kakabsat, nasinged iti pamilia, gagayyem ken am-ammo ta isuda ti inspirasion tapno matun-oyan dagiti arapaap. Panagyaman met iti lugar nga ayantayo ita--- agyamantayo gapu ti panangawatda kadatayo a makipagili kadakuada.

Kasta met a ditay' koma lipatan wenno ilaksid ti agyaman kadagiti Appo a Sakada, isuda ti rangtay ti nakaumayantayo iti isla ti paraiso, Hawaii.

Agyamantayo!

.

.

.

.

.

Aldaw ti Panagyaman

Rudy Ram. Rumbaoa

Hue. 27 Nob. 2o25

Wailuku, Maui

samiwengkenayatnirudy.blogspot.com

#panagyaman #aldawtipanagyaman #bendision #dios #sagut #naawat #givethanks #thanksgiving #givethankstothelord #samiweng #ayat #nov27 #rudyramrumbaoa

[Nabulod ti ladawan a nausar]

Ita Nga Aldaw: SABALI MANEN A KAPITULO A PANANGRUGI [Nga Agbiahe Iti Nawatiwat A Dalan Ti Biag, Oktubre 31]

Kalpasan dagiti nagkaadu a karit ken pannubok, dagiti ragsak ken rag-o, dagiti banag ken situasion a nangpasakit iti rikna, dagiti nasam-it ken naliday a pagteng a dimteng iti biag iti naglabas a sangapulo ket dua a bulan, adtoyak, idatagko ti bagik, nakasaganaak manen nga agdaliasat iti sabali pay a rinibu a milia-- tapno sangnguen ti di masinunuo nga itden a karit iti masangnguanan; masakbayan a diak ammo ti pagbanagan no ania ti agur-uray kaniak. Ngem saanakon nga agbiag iti napalabas. SIAK daytoy ita.

Kalpasan iti pakasaritaan ti kalman, naited manen kaniak ti baro nga aldaw. Ita, agyamanak unay iti Dios nga Apok gapu ti daytoy kapapatgan a sagutna kaniak-- ti biag. Ti sabali manen a kapitulo a panangrugi nga agbiahe nga agturong iti nawatiwat a dalan ti biag...

Agyamanak kadakayo a nagkablaaw ken nakalagip iti aldaw a panagtaok idi kalman, Oktubre 3o. Ni Apo Dios ti mangbedision kadakayo amin, kakabsat!

.

.

.

.

.

Ita Nga Aldaw:

SABALI MANEN A KAPITULO A PANANGRUGI

[Nga Agbiahe Iti Nawatiwat A Dalan Ti Biag, Oktubre 31]

Rudy Ram. Rumbaoa

samiwengkenayatnirudy.blogspot.com

[bukod nga ala dagiti ladawan a nausar]