AGRAG-O, agragsak ta nadanonan manen sabali a pangal ti biag!
Mayo 4, dimo lipatan- agyaman iti Dios. Agyaman kadagiti amin a bendision nga inka naawat. Naragsak a kaaldawan iti panagtao sika a dati a gayyem, kaayan-ayat ken kataktakunaynayko ita iti biag!
--
Impalais ti angin
Nariknak dingpilna
Bayat a nagtapaw ti kalman---
Saanak nga Isu,
Saanka met nga Isu!
Ngem naglanga
A kristal ti tema
Ti nasapa a bigat.
Kaduam ti angin
Kaduam ti init
Kaduam ti bulan
Maysaka a datdatlag
Kadagiti matak.
Inton rabii agtugawka
Iti nalinak a danum
Ti refleksionko.
Inton rabii, ayatenka.
Inton rabii, denggem
Ken bilangem ti ritmo
Tunggal pitik ti pusok.
Mayarigka a kas
Maysa a mannanakaw
Nga agsamsam
Ti kinabaknang--
Kuam tunggal angesko,
Ti bagi ken kararuak...
Nupay kasta, addaka latta
Kadagiti palayupoy ti rabii.
Kenka ti kinatalinaay nga uni,
Maysa a perfekto,
Kukuam ti garawko.
Sika ti baybay,
Kenka aglangoyak a sitatalek.
Tengngelmo dagiti allon,
Dinak baybay-an a malmes
Idanonnak iti takdang.
Aywanam, dimo ipalubos
A masugatak iti aniaman
A pakadangrak ket yadayonak
Manipud iti nakana a leddaang--
Ket ti apges a mariknak,
Umay agpaeng dita pusom.
Isut' gapuna---
Maysaka a linglingay
Sika ti isem
Sika ti apuy
Sika ti amin
Nga adda a makita
Dagiti matak.
Sikat' pakabuklan
Ti napintas a darepdep
Dagiti amin a madarepdep.
Mabalin a Sika
Ket Siak.
Mabalin a Sika
Ti Siak---
"Agingga a patay
Ti manggudas kadata..."
.
.
.
.
.
SIKA
[Ken ni Monica]
Rudy Ram. Rumbaoa
samiwengkenayatnirudy.blogspot.com
