"She is the One," madaman a maipabuya iti Queen Kaahumanu Theater, Maui, Hawaii...

Ne, ket awisenkay' man kapamilia ken kapuso ditoy Hawaii, nangruna iti isla ti Maui a mapan agbuya iti pelikula a "She is the One" a nangrugi idi Biernes, Oktubre 25 agingga no Oktubre 31, 2013, Huebes iti Queen Kaahumanu Theater. Mai-feature ditoy a pelikula da Best Actor Dingdong Dantes, Best Actress Bea Alonzo ken ni Enrique Gil.

Maipanggep iti panagpapagayam ken ayat, ayat iti nagbaetan dagiti nasinged nga agpagayam, nga uray naub-ubing ti maysa wenno natataengan ti sabali- agari latta ti ayat. Tay kunadan, "age doesn't matter."

Ken ammoyo kadi a maysa a patneng nga Ilokana ti nairaman ditoy a pelikula? Wen, ni LIZA SOBERANO, agtawen iti 15. Supporting role ti akem ni Liza iti pelikula. Ni Cornelia Soberano, retirado a hues ken agpapaay a kas maysa kadagiti direktor ti Women's Helping Women iti Maui ti aunti ni Liza.

Kuna ni Cornelia a nasingpet nga ubing ni Liza. Agdadamo pay laeng ni Liza iti pelikula ngem makita babaen iti panagarte a dakkel ti masakbayanna iti lubong ti pelikula. Kas met kadagiti sabsabali nga Ilokano, nagaget ken nasaririt nga ubing ni Liza.

Mangrugi a mabuya ti pelikula iti oras ti 11:05 iti bigat, 4:45 iti malem ken 7:45 ken 9:45 iti rabii.

Ania pay kukuenyo, intayon agbuya iti "She is the One!"

 

[Impatulod ni Cornelia Soberano ti naaramat a ladawan]