No Apay Ngamin A Saan a Sika?

Ni Rudy Ram. Rumbaoa



Makasalibukag-makaabbukay
Iti riknak ti ipalpaludip
Dagita nalanay nga isemmo,
Nabara a kas iti kadarang ti init
Ti aprosmo a mangsinit iti kaunggak;
Pumaspaspas 'toy pulso
A kasla adda itartarayak
Iti diak magawidan
A panagkulibagtong ti pusok...

Ah, adda pigket a mariknak,
Ti kasla kuriente
A mamagkuritengteng
Iti ikikita dagita naisem a matam
Nga agkarayam a dumanon-sumarut
Iti maituglepen a panunot--
Adda ketdi ragsak nga isabbuag
Ti tunggal dalluyon iti barukongko
Iti saan nga agsusurot a panagangesko.

Ngem dinakto mauyot
Iti manglimlimo a balikas
Nga agaun kadagita bibigmo,
Uray kunak a kayatko ti agsuko
Iti ipaypayapay nga awis ti gartem;
Akuek, taoak laeng a masulisog
Ta arigko't kandela a marunot
No agari't kinarukop ni Adan...

[No apay ngamin a saan
A sika't naipalad a para iti pusok
Tapno ti pusom para kaniak?]

Bay-ak laengen a pagilusionak
Ti isemmo
Ti aprosmo
Dagita naisem a matam,
Ngem iti makabasolak
Nga isunto ti pagbabaywak...

[CR11022008byrudyramrumbaoa]
___________________________