Ni Rudy Ram. Rumbaoa
[Ken ni Em]
Adda agkuna:
A gapu iti tallo gasut
Ken innem a pulo
Ket lima nga aldaw
A giwangta,
Saan nga umno nga ayatenka.
Kunak: saan a ti nagbaetan
Ti tawen ti makatubeng
Tapno maragpat ti kinaagnanayon--
[Ta ti agnanayon saanna met
Nga iyeg ti amin a kasayaatan...]
Ita a maika-duapulo ket lima nga anibersario
Ti umuna nga agekmo,
Palagdaek pay ti pundasion
A kas iti kalagda ti maiwarakiwak
A panagtalek, sakripisio ken pammateg
Tapno mapatalgedan uray pay
No saanta a bukbukod ti panawen
[Nagalisto ketdin ti panakalapgis iti bulong ti kaledario
a kas iti kaalistona a pangaron iti dalikan
iti di met laengen maluom a panagduadua?]
Nupay di mamengga latta dagitoy a sayangguseng,
Bay-am ta arkos ken siping dagita ti dila.
Siak ti patiem, Biagko, ta sika ti aminko--
A sika't kinaar-areng-engko iti kinaulimek ti rabii
A sika't nangtaraon iti biagko a kasilpo ti ayatko
A sika't samiwengko a ragsak ti angesko
[Bay-am, kunak, ta asakekto manen
Ti nalangto a karuotan tapno agitukitak
Iti bukel ni ayatko, ipusingmonto].
Kunak: kalpasan ti maika-duapulo ket lima a tawen
Ken tallo gasut ken innem ket lima a kalgaw,
Aywanak ti kinasin-aw ti panagayatko kenka--
A kas iti kapudaw dagiti ulep a nayaplag iti tangatang;
Taripatoek a kas iti apagbukar a sabong ti orkidia
Ti maputar a balabala iti daniw ti biag a sangalenta
Kadagiti sumaruno pay a basingkawel ti panawen...
[CRoctober302008byrudyramrumbaoa]
________________________________
"Dumngeg kadagiti makaabbukay a kanta ti iloko a naputar ken nagaun iti kalikagum ti puso. Dagitoy ti naitalimeng iti kaunggan tapno maikkan anges ti sonata ti kalman ken maibinggas iti agdama a mamalukay iti irteng ti rikna. No maminsan, pitingenna ti kaunggan ket lukaisanna ti linabag ti kalman nangruna no mainaig ken ni Ayat. Agbalin met a nota ti tunggal anges ket sika a mismo ti mangtempla ti kuerdas ni Ayat iti kayatmo nga ayug tapno rummuar ti napimpintas a himno ken rima ti biag..."
Samiweng. Daniw. Sarita. Salaysay. Damdamag, Kdpy.
Subscribe to:
Post Comments (Atom)
No comments:
Post a Comment