ni Rudy Ram. Rumbaoa
dinak dung-awan
dika met panawan
ketdi, ti bagim ti sangitam
iti aramid nga inka pagbabaywan.
umadayoak, innak agwalay
liwliwaek daytoy kinaliday
iti adayo a disso
sadiay agmaymaysaakto
padasek nga ipaayan rag-o
ti nagbanagan ayan-ayat
sadiay innak ipapas
kari nga inka winaswas.
diakto paiturayan
no kas pagarigan lumdaang
ti pusok nga inka sinugatan,
ngem daytoy ti pagpampanunotam
tapno inka mangabaruanan
iti inka kaniak nagkurangan.
nupay siak ti sinaktam
bagik diakto babalawen-
bay-akto nga agarubos
luluak inna ibubos
nasakit nga awaten
iti inta napagteng
bay-akto laengen
a lipaten ti panawen.
ngem laglagipem nga adda patingga ti dalan
simmiasika kaniak ket sabali't sinurotam.
kunak: dinak dung-awan
ta dika met panawan
isu't pagragsakam, dika madanagan
agnanayonto nga addaka't panunotko-
ti napalabasta, nagbalinka a pasetko...
[naiposte iti Iluko.com/10.14.07]
[copyright 2007 by rudy ram. rumbaoa]
_____________________________________
"Dumngeg kadagiti makaabbukay a kanta ti iloko a naputar ken nagaun iti kalikagum ti puso. Dagitoy ti naitalimeng iti kaunggan tapno maikkan anges ti sonata ti kalman ken maibinggas iti agdama a mamalukay iti irteng ti rikna. No maminsan, pitingenna ti kaunggan ket lukaisanna ti linabag ti kalman nangruna no mainaig ken ni Ayat. Agbalin met a nota ti tunggal anges ket sika a mismo ti mangtempla ti kuerdas ni Ayat iti kayatmo nga ayug tapno rummuar ti napimpintas a himno ken rima ti biag..."
Samiweng. Daniw. Sarita. Salaysay. Damdamag, Kdpy.
No comments:
Post a Comment