Panes ti napalabas

ni Rudy Ram. Rumbaoa


Sika pay laeng daydi dati, Maui,
a pagpitpitikan ken inayat 'toy pusok
inaramidko amin a kabaelak tapno agtaengda kaniak
iti paggammok a pakaay-aywam ken pakaragsakam.

Inkur-itko dagiti daniw a pinutarko iti barukongko
tapno ditoy a maitalimengda iti agnanayon,
ken di mapukaw ti uray maysa a naibinggas a balikas
a nagaun iti kaunggak, ngem nagbiddutak.

Iti laksid nga imbubosko ti amin panawenko tapno
agbalin a namaris daytoy ayat, saan gayam a kabaelan
a paneknekan ti kinapudnok iti kinarasi dayta a karim-
pinagang-angawam dagiti binukelko nga arapaap.
Kalikagumak met a marikna ti ragsak iti sidongmo-
ngem ania pay maaramidak, bukodmo itan ti timon.

Ngem kunak, Maui, adu ti burburtia iti biag a daliasatentayo
ket patiek, maysaak kadakuada ti pakaburiboram.
Agimahinasion wenno agilusiontayo,
ngem saan kadi a paset ti pannubok dagitoy a tuok?

Ala wen, Maui, simmiyasikan kaniak
pilim ti bukodmo a dana.
No kalikagumam nga aglasin ti dalanta
dika pawilan tapno aramidem ti kayatmo.
Ngem agingga a di aglunit ti sugat a pinarnuaymo-
silalagipak latta kenka nga agnanayon
A Sika, nagbalin a panes ti napalabasko.


[naiposte iti iluko.com 10/29/07
[copyright 2007 by rudy ram.rumbaoa]
____________________________________