 |
| [Nabulod ti ladawan a naaramat] |
Dinak palugodan
dilak mangibalikas
kayatko nga ibaga
Diak masurat
dagiti banag
nga adda't panunot
Diak makanta
ti kansion uray pay
adda musika iti pusok
Diak maibaddek saka
nga agsala uray pay
adda kompas ritmo ti angin
Annugotek, adda dagiti banag
a diakto pulos maaramid:
puted ti dilak,
pukol ti imak,
awan boses a sumngaw,
awan sakak --
agmaymaysaak iti kaikariak
adayo iti pangen ti tao, awan
kasarsaritak, ti panunotko
isut' plumak, ti karasakas
ti aglawlaw isudat' samiwengko,
ti sarukod isut' pannakadapan
a mangrikna ti daga a baddekak.
Agbibiagak ti soledad
awanan rikna, sipupuot
ngem nakettel ti ragsak
ti agang-anges a bangkay...
AGBIBIAGAK TI SOLEDAD
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment