Tallo a Daniw: Ipapanaw, Panagsubli, Panangsarabo [Kenka Dog Last]

[bukod nga ala ti ladawan]

i.
Linikudam ti kalman
sakbay a nagtabon
ti init, nagpakada
ngem dinak tinaliaw
iti ipapanawmo, 
tinurongmo ti desdes
nga agur-uray kenka.

Nabannayat panaglabas
dagiti aldaw kas ti rabii
nga aguray sabali a bigat,
inaldaw a taraonko ti saem 
gaput' sayasay ti dara 
iti sugat a pakalaglagipak.


ii.
Ngem apagbiit gayam
kaawanmo, kayatmo
a sublian dagiti tugot
a pinanawam a pagarupem
a mabalin pay nga akupen,
ilatag kadagiti dapan
ket usaren nga agsubli
iti naggapuan; saan,
supringek pagayatam--
ti agsubli kaniak, saankan
a maikari iti lubong 
a paggargarawak.


iii.
Diak koman kayat
a sublian-lagipen
napait a kalman,
adda kappia a mariknak
iti kaawanmot' dennak, 
ngem rumbeng laeng 
nga awatek, ibugasak
ti napalabas, nalpasen;
akuek, agur-uray met 
kenka ti sabali a bigat 
kas kabara panangsarabo
ti naatap nga orkidia
iti kaippasngay nga init.

Ipapanaw ken panagsubli,
panagsubli iti pinanawan,
panangsarabo ti panagsubli
panagsarang iti rupanrupa 
ti pimmanaw ken napanawan--

ngem sapay ta saanen
a maulit ken agbunga a nakiro
ti panagmaymaysata manen;

kas met la idi, 'yawatmo
ti tali a maigalut kaniak
iti nairut, mamagkamang
tunggal maysa a kabulon
panagtalek; panagkammayet
ti annongen--ti agserbi saan 
a para ti bagi no di pay iti sabali 
tapno masangal ti pagbinnuligan 
a balabala ti mabukel a daniw ti biag.


TALLO A DANIW: 
IPAPANAW, PANAGSUBLI, PANANGSARABO
[Kenka Dog Last]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com