Nalipatak Kadin?

Nalipatak kadin ti bosesmo
nga il-iliwek a denggen no
awagam ti naganko
bayat nga agkantaka
iti samiweng ken ayat
a manglalailo kaniak?

Dagiti kadi laengen karasakas
ti tsinelas a maipigad
ken maibaddek iti semento
wenno daga ti matimudko;
nga uray pay ti nalanay
a matam ken nakaparintumeng
a kurimatmatmo a paggaayatko idi
a matmatmatan diakon makita ida,
wenno napugas kadi metten
ti narag-o a rupam iti panagkitak?

No bilang dayta ti gapu a dikan
malasin uray simumulagatak,
wenno dikan maitimekan--
adtoyak, idatagko ti bagik
ket kiddawek a malawagan
ti nakusnaw a lagipko kenka;

akuek, nagayatak met ti nagalla-alla
ta kaarigko ti maysa nga alimbubuyog 
a nabisinan a nagsapul ti sisipek
a nektar ti sabong iti minuyongan,
ngem awan kadakuada 
ti il-iliwek a diro a pakataraonak.

Ket no ammom la koma
nga agbibiagak ita iti panaas
ti maysa a sugat; no sagidennak,
saanen a maisubli ti dati
a langa ti kudil gapu
ti piglat nga imbatina.

Kupkupikopannak kadi lattan
dagiti aprosmo a kas iti umel
nga agos ti nalamiis a danum
 nga agpussuak iti fontana
ket maisuyat iti bagik tapno
riingenna ti riknak iti rabii
a pannakaulilak nga agur-uray 
pannakaipasngay ti bigat?



NALIPATAK KADIN?
[ADTOYAK, IDATAGKO TI BAGIK]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com