Ibagam

no matayak iti paggugubatan
ipanmo iti kahon ti bangkayko
ipatulodmo iti ili a nakayanakak
iparabaw medalia iti barukongko:

ibagam iti inak inaramidkot' kabaelak,
ibagam iti amak saan nga agtamed kaniak
ta awanakton nga inna pagdanagan;
ibagam iti kabsat a lalaki nga agadal 
a naimbag, 
tulbek ti motorsiklok
maited a kukuananton;
ibagam iti kabsat a babai saan unay
a mariribukan, 
ti kabsatna a lalaki a nagserbi iti adayo 
aginana iti mabayag ken maturog 
no makababan ti init nga agtabon;

ken pakibagam 
iti ing-ingungotek a daga a dimmakkelan 
ta saanak a sangitan gapu ta a maysaak 
a soldado nga agserbi iti pagiliak
a mangirisgo ti biag ken pumusay gapu't ayat...



IBAGAM
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com