[Nabulod ti ladawan a naaramat]
kaparis ti riknak ti rosas
a nagkawes iti siit--no maiggaman
matudok ti dakulap ket agtedted
ti dara nga uray pay tumulang
ti panaas no kidagen
ti emosion, agptangken
nga umuneg sa agluluken
dagiti lasag a kas iti yelo
a marunaw no awanen lamiisna,
salpotenna aniaman a madalapusna
ket marikna ti ut-otna.
kas met kadagiti matak
no madigos ti lua aglabbaga
a mayarig iti napateg a bato,
ngem kalpasan a maipapas
amin a saibbek, agrangrang manen
a kas iti alipaga ti mapuoran
nga insenso nga umatibuor
ti asukna a sumuknal
iti tangatang a kas iti kararag
a mangsalbar ti kararua
a nalaus unay nga agpagus
iti intensidad ti maysa a banag...
.
.
.
.
kaparis
rudy ram. rumbaoa
dagiti koleksion a daniw, sarita, kanta ken dadduma pay
www.samiwengkenayatnirudy.blogspot.com
No comments:
Post a Comment