"Saan nga agbalin a tubeng no mataengan ti tao tapno laeng magun-od ti natibker a pondasion iti relasion. No ad-adu dagiti pannubok a dumteng wenno sumangbay, ad-adda a matennebka a mangsaranget iti rigat ket ammom dagiti pagkapsutan, no ania dagita a pakadukotan ken dardaras a solbaren ti aniaman nga agbalin a problema. Kunada ngay, dimon ipabigat wenno urayen a mapalabas ti maysa nga aldaw a solbaren ti di pagkinnaawatan. Dagdagusen a risuten ti aniaman a susik. Nasken ti panagpakumababa. No mabalin, awan koma ti mangitag-ay ti bagina ken nababa ti panagkita iti maysa. Saan a kasta ti agasawa. Ketdi, aniaman a balligi ti maysa, balligida a dua. Dagiti agasawa, adda met pormulasionda. Kasla chemistry ti arigna. Adda dagiti banag a dimo maawatan ngem no pagadalan ken padalanan a naimbag, maduktalan ti sungbatna. Kasta met a ditoy a marukod ti kinamanagteppelmo kadagiti [no daytoy man ket pisikal wenno material] banag a mangsulisog kenka. Maestablisar ti kinaasinom. Maadal ti ugali iti tunggal maysa ket agbalin a nasalun-at ti relasion iti aglawlaw ken nanglikmut kenka," kuna ti pagsasao.
Ket wen, duapulo ket tallo a tawenen ti napalabas, tumibtibker latta ti naimula a pondasion iti ayan-ayat kalpasan a nagmaymaysa ken pinagkaysami dagiti pusomi. Nagbalin a maymaysa ti dua idi naipasngay ti nadarisay a panagkinnaawatan, uppat a pulo ket maysa a tawenen ti napalabas—dos ti mabilang idi.
Saan ketdi a tubeng ti marikna, ti marikrikna, ti naiparikna. Nagbalin ketdi a komunikasion daytoy tapno maidanon ti tarigagay a mangpiting ti kalikaguman ken im-impenen. Nagbalin a rangtay a mamagkamang iti agsumbangir a disso tapno al-alisto a maragpat dagiti nabukel nga arapaap. Nupay adda dagiti agpanggep a mangbukkual ti naimula a muhon iti relasion, dida nagballigi. Ad-adda laeng a pinairotda ti tali ti nagkinnarian, ad-adda laeng a nagsampaga dagiti sabong nga ita agadiwara ti banglona iti napagkaysa a hardin ni ayat.
Nagbunga.
Ti ayat, saan laeng a balikas. Saan laeng a makita. Marikna ketdi. Riknaen. Ikanta. Imutektekan ti pudno a linabag ken anag ti uppet a letra...
.
.
.
.
.
Rekuerdo: Dos Idi Nagtinnukma, Naibanag iti Katorse
HULIO 14, 2oo1
Parokia ni San Jose
Siudad ti Laoag
No comments:
Post a Comment