Maudi A Parang

Nagpatnga iti entablado

Ti agpabuya a narapis a lakay

Iggemna ti tulbek a manglukat kadagiti aldaw

Yawatnanto iti sumaruno nga agparang

Nupay saan a kas iti dati ti ragsak

A naipinta iti rupa 'toy duogan

Ta ammona a dinton agbayag

Iti entablado a pagpabuyaan

Nalaus ketdi ti yamanna

Iti amin a nangasibay kenkuana

Iti sangapulo ket dua a bulan

Sadiay, linagipna ti napalabas:

Isasangbay dagiti kalgaw ken layus

Panagayus ti dara ken lana ti oliba

Panagbannawag ken idadateng iti sumipnget

Panagsabong ken panagapit.

"Tarabayennakayo koma ti Apo!"

Sipapakurang nga indawatna

Inwagisna ti imana a tanda

Ti panagpakada

Iti entablado nagal-aludoy nga immulog

Tapno umuli ti sumaruno nga agpabuya

A maysa a maladaga...

.

.

.

.

.

MAUDI A PARANG

Rudy Ram. Rumbaoa

Naipablaak iti Bannawag, Enero 25, 2o1o Isyu

samiwengkenayatnirudy.blogspot.com

[nabulod ti ladawan a nausar]