AY, nagalisto ti panawen a maluom! Nadanonan iti ungto ti tawen ket di malibak, adda segga ken gagar ti panaguraytayo iti isasangbay ti Baro a Tawen.
Iti damo nga itatapog ti umuna nga aldaw ti tawen, masirayantayo koma ti raya ti namnama ket maikawes kadatayo ti baro a kinatao a kas iti panangdayas ti init iti sabong ti orkidia tapno lumangto ken agsampaga. Wen, irugitayo nga asaken ken unoren ti dalan ti agur-uray a pannubok ken karit ti masakbayan a ditay' ammo iti pagbanagan ken gasat a yegna kadatayo. Gasat a kinaimbag nga intay' masagrap wenno gasat ti kinamalas.
Ngem yarigko man ketdi daytoy a gasat kas ti maysa a kalangtayan a pagballasiwan iti karayan. Iti babaen ti kalangtayan: adda dita a nakasagana a mangilaw-an dagiti agur-uray a sulisog, dagiti manglamlammiong ken mangiyaw-awan a tattao, dagiti aramid a dakes, apal, gamrod, suitik, agintutuleng, aginkukuna, biangot, nakikamalala, aginsisingpet ken managimbubukod. Ngem iti ballasiw ti karayan, agur-uray ti naimbag a gasat a para kadagiti ammona ti agbabawi, naemma, pagulidanan, mannakikappia, manangngaasi, makisimpatia/makipagrikna, managipateg, managayat, managpakumbaba ken managbuteng iti Dios.
Tapno magun-od dagitoy a parabur, masapul ngarud a ballasiwen ti karayan nga aramaten ti kalangtayan a dika pulos matnag. Ana kayatmo a magun-od ti naimbag a gasat? Adda kenka a magna a siaannad iti kalangtayan tapno madanon ti ballasiw ti karayan: ti agur-uray a naimbag a gasat.
Wenno kayatmot' tumapog iti karayan tapno makipaset kadagiti naindagaan a paggarteman ken pagragsakan? Laglagipem: "Sika't timon ti gasatmo, ngem agbalin dagiti naimbag nga aramid a kas kalangtayam a dumanon iti Dios; ket babaen Kenkuana, agbalin a kalasagmo iti tunggal addang tapno masagrap dagiti bendision ken paraburna.
Ngem baro a tawen, kunam? Ania ngarud ngay ti baro a tawen no maulit-ulit latta ken ditayo met isarua dagiti madi nga ugali ti kinataotayo ken ditayo ammot' makikappia kadagiti makuna a bumusbusor ken nangpasakit kadatayo, wenno dagiti kabusor ken pinasaktantayo?
Kunada man, "Dagiti umaw-awag iti kappia isudat' adu ti kabusorna ta saan a pagtalnaen ti konsensiada dagiti nangisit ken dakes a panagemda."
Ti nasayaat ken naimbag a Kristiano ipakita ken ipariknana ti pudno nga anag ti ayat ken pateg babaen iti pannakikappia. Maiwalin manen ti maysa a tawen ngem ditay' met uksoben ti daan a kinatao tapno sagrado, naim-imbag ken nagasgasat, naimballigian, naespirituan, ken baro a kinatao ti intay' ikawes iti panangsarabo ti baro a tawen. No kasta met laeng nga iyanninaw ti napalabas ti agdama, adda kadi pangabaroanantayo?
Awan, Kaka! Dagitoy dakes nga ug-ugali ti al-alia iti kinataotayo ket di malibak, ditayto pulos maitarayan daytoy iti unos ti panagbiagtayo ta agbalinda a ruker ti pakasaritaantayo iti mata ken lapayag dagiti tao. Riduma iti kinatao a no tunggal madinggalda ti lasag, yegna ket agkarayam ti apges ken ut-ot a gappuanan dayta a sugat. Pudno dayta ta dinto pulos aglumen ti sugat agingga a di maikkat nga umuna ti riduma, kirkirkirannanto latta ti namansaan a kinataotayo. Dagiti tarigagaytayo a tinubay ti nabiag a sirmata ngem pumusay met dagiti naikari nga aramiden tapno koma adda pakakitaan- saan a balansiado, dagitoy ketdi ti tubeng iti saan a pannakaipatungpal dagiti banag ti panagbalbaliw. Annugotentay' man wenno saan, naipigketen dayta nga ugali ket nagbalinen a paset iti kultura ti kinalaingtayo nga agibalikas ngem iti ungto dayta a panagkari, ditayo met aramiden ida. Ubbaw ken salawasaw!
Kalpasan ngarud ti serioso ken naannad a konsiderasion, intayo pabaroen ti kontrata tapno maibanag dagiti saantayo a matungpal a resulusion iti daytoy a tawen ken uray pay iti naglabas a tawen. Narigat man a desisionan ngem rumbeng nga aramiden. No ania man dagitoy a kayatmo a mapabaro, sikat' makaammo iti dayta...aramidem ketdi itan. Baro a panangirugi. Saan pay met la siguro a naladaw, aya?*
Kawitek man ti daniw nga impostek iti Iluko.com idi Setiembre 29, 2007 a napauluan iti "Kasapulan." Agbalin koma daytoy nga inspirasion tapno agballigitayo a manggun-od ti "Baro a Panangirugi."
Taraon ti kasapulan ti bagi
Lagip ti kasapulan ti bulsek
Namnama ti kasapulan dagiti marigrigat
Kinasirib ti kasapulan ti panunot
Pammati ti kasapulan ti panagtalek
Kinatured ti kasapulan ti panagbuteng
Ayat isu ti kasapulan ti puso
Kararag ti kasapulan ti kararua.*
.
.
.
.
.
Saan Pay Met La Siguro a Naladaw, Aya?
Rudy Ram. Rumbaoa
Naipablaak iti nagsardengen a Fil-Am Observer ti Maui
samiwengkenayatnirudy.blogspot.com
[nabulod ti ladawan a nausar]
No comments:
Post a Comment