ni Rudy Ram. Rumbaoa
[pinalagipanka ngem nagbalinak a tubengmo:
inyad-addam ti nagkatang-katang
nagal-alawaaw kadagiti aramid a paggartemam,
binaludnaka dagiti nagduduma bisio
agingga a nayaw-awanen ti kararuam;
nagpapasam nagduduma a ragsak
iti nakiro a lubong, nalipatam ti pamiliam.]
garampingat ti samiweng iti tangatang
a kumpasan nagduduma a maris silaw di makamulagat,
iti entablado agsalsala ti agaw-awis a sulisog
ngem kaykayatmo a paayusan karabukob iti arak nga ilidok...
iti uneg ti kuarto, manglangit nagduduma nga asuk
arigna't simborium nga ipug-aw dagiti adik ken biangot,
dagiti padam a nayaw-awanen sabalin ti naturong
masakbayanda a naigaga ngem nagbalinen a buong...
no kuan di agtalna dayta panunot kasla mapungot
umisemka ken agpaggaak kasla kinimkimanen ti buot,
arigmo't agballa no mausawan awanen ti epektona
ti droga nga impaunegmo a mamagkalma dayta rikna...
ita kunam a siak ti tubeng ngem laglagipem
a diak nagkurang pammagbagak, inallilawmo ti panawen;
iyik-ikkismo't panagbabawi ngem ania pay maaramidam
nalpasen ti nalapabas anusam agbiag uneg pagbaludan...
ala, adda met ragsak dita a nagtungpalam
ta adda gundaway dagiti nakabasol a mangabaruanan,
saan a dita ti paggibusan ngem isu ti pagrugianan
a lintegem dagiti biddut tapno malawlawagan dayta nagan...
nupay nalpasen a pinerdim ti masakbayam
padasem manen nga ukkonen ti namnama a binaybay-am,
sadiay mariknamto ti pateg ken ayat ti pamiliam
ta uray dagiti nailaw-an maited kadakuada ti pammakawan!
[laglagipem: adda latta dagiti pannubok ti biag umar-arubayan
naangaw ni gasat, isagmaknaka ngem mabalinmo ida a liklikan,
bay-am ketdi a mapasag-maitanem nagbiddutam a kalman
tapno dagiti ariangga ti garampingat a samiweng aggibusdan...]
[copyright november10,2007 by rudy ram. rumbaoa]
__________________________________________
