Saniata

Sabongmo, Saniata,

Banglonat' agadiwara

Libnos pingping naabbongan

Sumirip-tumungraraw maayatan.

Banglo 'ta sabongmo nagpaiduma

Nagganas say-open mabang-aran rikna

Ilima, Pikake, Orkidia wenno Rosas

Ayamuomda maitalimeng kaunggan.

Sabongmo, Saniata,

Anian, ania ketdin a banglona

Uray ni Juan a kumkumleb-maayatan

Mangapros iti sabong a kababangloan.

Wen, 'ta sabongmo dimo ipaidam

Ken ni Juan perme masmasnaayan

Nabayagen inar-arapaapnat' kas kenka

Pagustoam kadin tapno agtalna, ala!

Lukaisam nangabbong iti pingping

Agek ni Juan inna man idingpil,

Riknaem man bara ti bibigna

Diro ni ayat nga awan pumada.

Dayta sabongmo, Saniata,

Ni Juan agrukbab unay kenka...

.

.

.

.

.

SANIATA

[Erotiko a Daniw]

Rudy Ram. Rumbaoa

samiwengkenayatnirudy.blogspot.com

#ilokodaniw #saniata #erotikoadaniw #sabong #pingping #naabbongan #tumungraraw #sayopen #ilima #pikake #orkidia #rosas #kumkumleb #lukaisan #agrukbab #samiweng #ayat #rudyramrumbaoa

[nabulod ti ladawan a nausar]

Agyamanak

[nabulod ti ladawan a naaramat]

agyamanak ti panagsublim iti panagmaymaysak
saan a gapu ti kaadda ti salugsog iti nakem
adda ketdi imbatina a batonlagip a pakalaglagipak-

wen, saanmo a basol ti nagbiddutam
ta di marikna dagiti saan a makaawat,
ngem adda ketdi agur-uray a karit a mangtakuat
dagiti saludsodmo a kayatmo a masungbatan.

agyamanak ti panagsublim iti rupam nakitak
naisangsangayan a pintas saan a mayebkas,
adda rimat dagita matam nasarangsang katawam
iti rinibu a milia a kaadayo nagsublika't arpad.

iti kaaddam kaniak padasek nga isapulan
ti di mabilang a saludsod tapno masungbatan,
saan a gapu ti kaadda ti salugsog iti nakem
pukawen sainnek barukong tapno aggibusen.

agyamanak ti panagsublim iti panagmaymaysak
saan a gapu ti kaadda ti salugsog iti nakem-
maipasngay sabali a biag iti kaaddam kaniak.



-rudy ram. rumbaoa
 agyamanak/immuna a naiposte iti iluko.com idi enero 2006
 dagiti koleksion a daniw, sarita, kanta ken dadduma pay
 www.samiwengkenayatnirudy.blogspot.com

kurdapya

[Nabulod ti ladawan a naaramat]

ay wen, kurdapya, pumanawka
iti sidongko dinak singaen, ala,
ta nabayag idin a sisiimenka
napukawen anus ken pasensia.

wen kurdapya, adaywannak, ala,
tapno mabang-aranen 'toy rikna;
ibagam idi a sabidongak kenka
waswasemon ti nagkinnarianta.

diak dagmel tapno ikutannak latta
tapno bukodam ragsak a dimo kukua,
diak met bulsek tapno diak makita
aramidmo a paggaayatan dadduma.

no kunak, adaywannak, kurdapya,
ta ginibusakon ti relasionta
uray naglaplapunosan ayatko kenka
ibabawik itan ta dinakon kukua.

imbagam idi a siak ti samsam-item
gayam nagbalinak nga inka papaiten,
no koma ammok a kastoy nagbanaganna
diak pinagbayag daytoy ayan-ayatta.

ita ta nasapa pay, kurdapya,
adaywan, panawannak kunak kenka,
tapno di agleddaang pay 'toy riknak
ken diak ay-ayen di agbalin a gasat.


-rudy ram. rumbaoa
 immuna a naiposte iti iluko.com, aug2006
 dagiti koleksion a daniw, sarita, kanta ken dadduma pay
 www.samiwengkenayatnirudy.blogspot.com

Panagbaniaga

[Nabulod laeng ti ladawan a naaramat]

PANAGBANIAGA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay


Adayo unayen dagiti aplaya a nagnaam
Ta nadanonmo payen ti sabali nga iking
Ti lubong, ngem ti linikudam a paris ti tugot-
Akupekto ket ilatagko ida iti disso a saan
A mapuyupoy ti angin ket dagiti rekuerdo
Ti nanglunnuyanta 'di bara ti pinagkamang
A rikna, agpitik iti nangtunekanta a kadaratan.

Diak masbaalan, diak matuokan nga agbilang
Iti aldaw nga aglabas uray nalawa ti nagbaetan
A baybay, dagiti surat ti agbalin a rangtay
A mangidanon ti maep-ep-epan nga iliw.
Uray pay nabannayat ti idadaliasat dagiti rabii
Gapu iti panagkarayam ti lamiis, wenno pettat
Ti panunot gaput' pannakaulilak iti kaawanmo,
Agnanayon a yusokko ti singsing iti ramay
A tanda ti kinatarnaw ti sinalimetmetak a kari.

Ket bayat ti panagaksawmo nga agturong iti
Desdes ti masakbayan, iyismagelnak kadagita
Dapanmo tapno iti lugar a mabaddekam,
Madanonko; ti balligi a magun-odmo, dinak
Lipatan, mariknam nga agpitpitikak dita puso.

Ta uray pay kunam nga addakat' adayo
Ta saanko a masagid dagita ima, ti bara
Ti aprosmo wenno saanko a mangngeg
Nga ibalikasmo ti naganko wenno dika makita
Wenno maarakup; asidegkanto latta ti kunak
Agnanayon nga addaka kaniak ta mariknak
A nabuloska kadagiti uratko kas dara, makitaka
Iti panunotko, mangngegka iti lapayagko-

Nga uray kunam a rinibribu a milia ti rukod
Dagiti nadaeg nga aplaya ti pagnaam, patiek,
Taliawen dagiti tugot a mapanawam, subliam
Nga asaken ti desdes a naggapuam a sadiay
Ti pagtabonan ti init, ti linikudam a kalman...


Copyright.by.RudyRam.Rumbaoa.10.4.2015

Giwang ti Ekspektasion

[Nabulod laeng ti ladawan a naaramat]

GIWANG TI EKSPEKTASION
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay


Ammok nga awanen ti ekspektarek 
a ragsak, wenno pannakontento,
wenno bang-ar, wenno panagganas, 
wenno pakaay-ayoan, wenno ad-adu pay
a kinasirib a manglawag ti kapanunotak 
ngem iti panangikompera ti ekspiriensa
iti ekspektasion wenno ti tagtagiurayek; 
wenno ti panagrehistro ti tunggal oras
wenno ti oras iti panawen 
tapno mapaggidiat ti konsepto iti kinapudno. 

Mabalin ti naanus a panagsukimat 
wenno panangobserbar ti panagdakkeltayo 
iti nakurang a kargo wenno obligasion 
iti pannakakelltay ti di pannakatungpal 
ti kari wenno ti di pannakaited ti ekspektasion.

Malaglagipkanto Latta

MALAGLAGIPKANTO LATTA
[Ken ni Emeterio T. Rumbaoa]
Ni Rudy Ram. Rumbaoa
-Dagiti Koleksion a Daniw, Sarita, Kanta ken Dadduma Pay


...agrukop ti bagi
   situtulok karurua
   a rabsuten ti panawen:
   binulodtay' laeng ti biag.


Apagdarikmat a malapgis
Ti bulong ti kalendario
Apagkanito nga aglabas

Dagiti aldaw, nagalisto
Panagpitik ti pagorasan;
Di mabayag malpas manen

Sabali a tawen. Ngem,
Malaglagipkanto latta
Iti nabayagen a kaawanmo:
Iti panunot
Iti pusok-
Ti pateg
Ti ayat
Ti dungngo
Agnanayondanto
A maitalimeng kaunggak.

Sikat' nangitukit ti bukel
Tapno aywanan ni Ina,
Dimmakkel ken nagrampaya

Inyegnat' anges
Ti pulso: Wen daytoy ti biag!

Ngannganin duapulo a tawenen
Ti napalabas idi insublim binulod
Nga anges iti Namarsua, 

Dakkel a kawa iti kaawanmo
Ngem nagbalin daytoy a karit
Tapno sarangten dagiti pannubok.

Nakana a liday ken napnoan
Sanaang iti rikna ti isisinam,
Maipalagipto laeng 

Dagiti balikas a nangted
Namnama; ta uray maiddep
A manglipat ti napanayag 

A rangrang ti init, dinto aglumen
Dagiti ragsak; dinto malaylay ti biag-

Nabangonen ti pakasaritaam
Kadakami ta impaaymot' napudno nga ayat...


CR.Rev.by.RudyRam.Rumbaoa.2015

Sika ti Aminko

SIKA TI AMINKO
Ni Rudy Ram. Rumbaoa
-Dagiti Koleksion a Daniw, Sarita, Kanta ken Dadduma Pay


Ragsak-biag
Liwliwat' kararuak,
Ramenka't kaunggak

Siak ken ti arapaap...
Masakbayak, silawka
Inyegmot' ayat gabayka

Samiweng sabongka
Iti nakiro a lubong-
Sikat' talingenngen...

Riknaem
Ti iliw
Agayus kas diro

Iti agdanapeg a barukong:
Ti ayat
Ti bara
Sam-it agekko
Ti rugso-karayo.

Baro nga agsapa
'Yegnat' namnama
Anaraarka iti sipnget

Sardam mangyeg iti ulimek...
Wen, sika ti aminko:

Ti ragsak
Iti lubong
Nga awan kuriro.


[CR.2008.by.rudy.ram.rumbaoa]

ITI SIROK TI BITTAOG, Karaman a naipatarus iti Tagalog iti libro a Dandaniw Ilokano: Mga Tulang Ilokano, 1621-2014 edited

[Nabulod laeng ti ladawan ken ni Junley L. Lazaga]

ITI SIROK TI BITTAOG
Ni Rudy Ram. Rumbaoa
Naipablaak iti Bannawag, Marso 14, 2011 nga Isyu
Karaman a naipatarus iti Tagalog babaen ken ni Junley L. Lazaga iti Libro a Dandaniw Ilokano: Mga Tulang Ilokano, 1621-2014 edited

Daydi a rabii ti kapatgan a sagutmo:
Natarusak dagiti balikas ti bibig ken matam
Iti sirok ti bittaog, binalud dagiti takiagko
Dagiti naglulumba a dalagudog ti barukongmo
Awanen ti naaramidan ti lamiis ti rabii
Ta naginudotan iti bara ti patempategta

Inaldaw-aldaw nga impalpalagip ti alimbubuyog
A masansan a manglikawlikaw kadagiti sabong
Daydi a rabii a pinagkamangta ti lamiis iti kaltaang
Nakarimrimat dagiti kulintaba a nangbasisaw
Iti lamolamo a tangatang ken sellag a bulan

Ngem ti sangapulo a tawen, sumeksek ti lam-ek
Uray kadagiti gumilgil-ayab a kuaresma ken kalgaw
Maregreg dagiti sampaga ti sabong ken ti alimbubuyog
Maulila nga agngatangata kadagiti bulong ti bittaog.

AYAT TI MAYSA NGA INA

[Nabulod laeng ti ladawan a naaramat iti daniw]

AYAT TI MAYSA NGA INA
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com


No dadduma, ti ayat ti maysa nga Ina ket narigat
A mailawlawag ta adda kenkuana ti kaunegan
A debosion, sakripisio ken panagibtur; ta awan

Pagnguddoan, saan a managimbubukod-
Aramidenna ketdit' amin a pagsayaatan ti pamilia
Awan makarpuog wenno makatakaw iti dayta

Nga ik-ikutanna; ngem naanus, naasi ken sindadaan
A mamakawan no adda biddut a maaramid.
Saanna ketdi padpadasen ti mapaay

Uray no iti kaunggan ti puso a mariknana
Ti kasla mapirpirsay. Mamati ket mamatinto latta
Iti labes dagiti nagkaadu a pannakasuotna

Iti nakiro a lubong ti pannakakondena-
Ngem isut' karaniagan ti andap kadagiti amin
A napipintas a banag a makita wenno marikna,

Wenno kadagiti manmano ken karkarna
A masarakan ti klasena a napateg a bato
A kas iti diamante, balitok wenno pirak;

Ngem ti ayat ti Ina ket saan a gangandiong,
Saan a peke no di ket pudno ti naibaklay
Kadagiti abaga nga akmen a responsibilidad;

Nalablabes pay ngem iti itudo a pagrebbengan
Ti ayatna bilang Ina ta karitenna ti amin
A pannakailawlawag iti tunggal makita, masagid

Ken marikna, ngem agtalinaed a sikreto
Kas iti misterio ti nakaparsuaan, wenno kas iti kaadu
Ti kinadayag ken kinangayed a milagro a saanto

Pulos maawatan ti tao ti kaipapananna-
Ta maysa daytoy nga ebidensia a pagsidsiddaawan
Manipud iti kaasi ti Dios iti panangibagnosna ti lubong.


[copyright by rudyram.rumbaoa.5.3.2015]

LIPATEK

LIPATEK
ni Rudy Ram. Rumbaoa
-Dagiti Koleksion a Daniw, Sarita, Kanta ken Dadduma Pay/
 www.samiwengkenayatnirudy.blogspot.com./11.30.08




Lipatek naglabas a kalman
tapno maagasan sugat, apges
iti pusok a mariknak; nagpasarak

iti manglimlimo nga ayat.
Ngem narigat sa man
a mapukaw, nabiag latta

ti piglat- di maungaw;
uray lipatenka ti kunak
agarit' lagipmo't kaunggak.

Wen lipatek koman linabag
napait a kalman ta patiek
adda baro a namnama a sumangbay

iti mainaw nga arapaap, nadarisay.
Lipatek, wen lipatek daytoy
a tuok tapno malasatak pannakasuot;

ti isisinam iti panunot bag-utenna
siit a naipalay mairaman a pumusay.

[Ngem apay a tinallikudannak- gapu kadi
 iti diak irurusing iti arapaapmo a nabayag
 idin a ninamnamam?]

Ala, lipatennak ngem diak lipatan;
patiek nga adu pay nabati a panawen
inta panagsarang-

Ulitek: diak kayat ti sumina
ta ti isisina kaaspingna ti sinamar
a linangeben ti angep ken napuskol

nga ulep iti tangatang
ti agkatangkatang nga arapaap.


[copyright.rudy.ram.rumbaoa.2008

AGPAKADAAK KENKA

[nabulod laeng ti ladawan a naaramat iti daniw]

AGPAKADAAK KENKA
Ni Rudy Ram. Rumbaoa
-dagiti koleksion a daniw, sarita, kanta ken dadduma pay


Ala wen, agpakaadak kenka, Maui
Sika a ragsakko, ti kakaisuna a kukuak;
Ta naipalad kaniak daytoy nga oras
A mabibbibi ken agsagaba nga agmaymaysa...

Nadanonanen ti tiempo nga agsinat' dalan;
Kailiwkontot' bara ti nairut nga arakupmo.
Naliday a partaan ti mangpespes iti pusok;
Kasano nga agbiagak ken sadino ti pakaidasayak?

Saan nga agpusaksak ti orkdia no awan linnaaw
Kas iti panagdakkel ti lila, wenno kas iti pannakawasay
Ti nakabayog a kayo- kasano ngay
A makalasat ti nasugatan a pusok?

Saan nga iyeg ti panagbannawag ti kinatalinaay
Ket awanto ti angin a mangmaga iti luak,
Wenno yeg ti init ti ragsak no duayyaen 
Ti kinasipnget ti rabii ti pannaturogko.

Ngem kas iti panagtedted ti linnaaw kadagiti sabong,
Napait ti luak iti kinaawan panaggibus a panagarubosna;
Wen, sakit ti nakem ken liday ti mangpigis iti lasag
Nupay awan, wen, awan ti mangngaasi kaniak.

Uray dagiti kayo ammoda nga awan inana a lak-amenda
Ta agmaymaysaak nga agbanang-es nakakaasintot' panunot;
Wenno kaarigko iti piman a tumatayab a napukawan
Iti umok ket ti rabii a pagdagusan diakto mabirokan.

Ket iti inaldaw a panagani, siakto ti agpuros
Iti lua manipud iti barukong ti agsagaba a puso;
Ken uray pay no kasta ti kaadu ti isangitko,
Saanto a mapedpedan ti lua ti apuy ti ayat!

Ngem aglayagto sadiay langit ti payak ni ayat,
Ket 'toy kararuak sapulennakanto iti sadino a lugar
Nga ayanmo. Inay-ayatka ken ay-ayatenkanto
Agingga a mailatagak a maibaba iti agur-uray a tanemko.

*copyright by rudyram.rumbaoa.9.2.2013.maui 

Kailiwko Unay

KAILIWKO UNAY

Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay


Kailiwko daydi bara ti arakupmo iti naudi a panagsarangta 
kasla mauyos 'toy angesko; kunak daytoy ta awan man la 
ti imbalikasmo- pimmanawka't sidong nariknak saem 
iti barukongko, nadagsen dagiti addangmo nga immadayo...

Natuok a saan dagiti aldaw a nabattaway ta binilbilangkot' 
bulan nga innak panaguray, no maminsan umaribayan 
areng-eng ti sulisog tapno guloennat' nasimbeng a panunot
ket ikaranukonnak iti agaw-awis a limdo...

Ngem diakto aramiden ti kasta, Biagko, ammom a napudnoak 
iti insapatak a kari; agur-urayak ta patiek nga agsublikanto kaniak
tapno biagentat' napalabas ti naitanem a sugat...

Wen kailiwko unay daydi nasarangsang a katawam a nagbalin 
a ray-aw, kas da la samiweng iti kaunggan; ta asino aya 
ti di maliwliwliwa iti kinadungngom kaniak idi impaaymo 
ti langit ken di magatadan a ragsak?

Ah, agur-urayak ket patiek nga awanen makatubeng ta uray 
ti piglat in-inut a pugasen ti panawen; wen, umayka ta riingentat' 
naituglep a rikna ket agdanggayta a mangiwaksi ti mansa 
ti panagduadua tapno agtaeng iti puso ti pammati ken talinaay.

Adda Gundaway Dagiti Nakabasol a Mangabaruanan

[Nabulod laeng ti ladawan a naaramat iti daniw]

     "Pinalagipanka ngem nagbalinak a tubengmo:
      inyad-addam ti nagkatangkatang
      nagal-alawaaw kadagiti aramid a paggartemam,
      binaludnaka dagiti nagduduma a bisio agingga
      a nayaw-awan ti umno a dana a surotam,
      nagpapasam nagduduma a ragsak iti nakiro
      a lubong-- nalipatam ti pamilia..."

Garampingat samiweng iti tangatang a kumpasan
Nagduduma a maris silaw a di makamulagat,
Iti entablado agsalsala agaw-awis a sulisog; ngem
Kaykayatmo a paayusan karabukob arak nga ilidok.

Iti uneg ti kuarto, manglanglangit agatibuor nga asuk
Arignat' simborium nga ipug-aw dagiti adik ken biangot
Dagiti padam a nayaw-awanen sabalin naturong
Naigaga a masakbayan, ngem nagbalinen a buong.

Arikapem buokmo, di agtalnat' panunot kasla mapungot
Umisem ken agpaggaakka kasla kinimkimanen ti buot
Arigmot' agballa no mausawan awanen ti epekto
Droga nga impaunegmo a mamagkalma 'ta rikna.

Kunam ita a siak ti tubeng ngem laglagipem,
Diak nagkurang pammagbagak, inallilawmot' panawen
Yik-ikkismot' panagbabawi ania pay maaramidam
Nalpasen napalabas anusam biag uneg pagbaludan.

Ala, adda met ragsak dita a nagturongam
Ta adda gundaway dagiti nakabasol a mangabaruanan,
Saan a dita ti paggibusan ngem isut' pangruggian
A lintegem biddut tapno malawlawagan 'ta nagan.

Nupay nalpasen a pinerdim ti masakbayam
Padasem manen ukkonen namnama a binaybay-am,
Sadiay mariknamto ti pateg ken ayat ti pamiliam
Ta uray dagiti nailaw-an maited kadakuada ti pammakawan!

   "Laglagipem: adda latta dagiti pannubok ti biag umar-arubayan
    naangaw ni gasat, isagmaknaka ngem mabalinmo ida a liklikan,
    bay-am ketdi a mapasag-maitanem nagbiddutan a kalman
    tapno dagiti ariangga ti garampingat a samiweng aggibusdan."

ADDA GUNDAWAY DAGITI NAKABASOL A MANGABARUANAN
Rudy Ram. Rumbaoa
-immuna a naiposte iti iluko.com/dagiti koleksion a daniw, sarita, kanta ken    dadduma pay/copyright.by.rudy.ram.rumbaoa/11.10.07

Teddek ni Filipino iti Hawaii [Lagip ken ni Sakada]

[Nabulod laeng ti ladawan a naaramat. Maysa a buya dagiti nagkauna a sakada ti Hawaii]

Teddek ni Filipino iti Hawaii [Lagip ken ni Sakada]
ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
nasurat.12.2006

Naikupinen, Sakada, sabali a pakasaritaan gapuananyo
ti kinasiak, ti pamiliak ken ti sibubukel a Filipino;
manipud Oahu, Big Island, Maui ken Kauai
agraman Lanai ken uray pay ti Molokai.

Kalpasan nasurok sangagasut a tawen, idir-mi ti ragsakmi
sibibiagka iti lagipmi, sikat' gapuanan ken ramutmi;
kalpasan dagiti naglabas a tawen, ikantami iti sangalubongan
ti adu a sakripisioyo kadakami, diminto malipatan.

Dagiti rigatyo iti kapinyaan ken uray iti kaunasan
pinanawanyo a pamilia diyo la ida binaybay-an,
uray rinibu man a milia ti inkay' nagbabaetan
maipaayan laeng napintas ken raniag a masakbayan.

Karamanka latta iti amin a pagsayaatan
dayawendakat' sabali a puli ti sangalubongan,
gapu't ayat, pammateg ken kinamanagparaburmo
mararaem, maitandudo ken umuna latta ni Filipino.

Addan dagiti pasdek nabangon a pakalaglaipam
FilCom Center iti Oahu a pagguummongan,
sabali laeng ti nadaeg a Binhi at Ani
a masarakan iti agdindinamag nga isla ti Maui.

Ket kas pammigbig ti anus ken sakripisiom
naragpatmi ti balligi nga inkam' kadakayo idaton,
wen ta kabaelanmi ti makidinnaeg sabali a puli
a makipagnaed iti Hawaii, ipagtangsitmi.

Naimarkan iti agdama a kaputotan naaramidanyo
kalpasan nasurok sangagasut a tawen nga isasangladyo,
sumarsaruno a henerasion ituloydanto ti narugianyo
tapno iti aramid ken pannao, malagipda ni Filipino!

LadyHeart

[Nabulod laeng ti ladawan a naaramat]

LADYHEART
ni Rudy Ram. Rumbaoa 
naadaw ti paulo ti daniw iti maysa a blog ti iluko.com "Ladyheart" 
Dagiti Koleksion a Daniw, Sarita, Kanta ken Dadduma Pay 
[c] 11.24.2007

Adda italtalukatik dagiti matam
tunggal agsabatta iti dalan,
matiliwanka innak mingmingmingan
kasla adda kayatmo nga ibagasan.

Makaabbukay iti rikna nga isemmo
a danggayan ti apagdillaw a kallidmo,
isuda man ti ray-aw a pakagutigotan
kenka, imnas, kasano nga inka liklikan?

Akuek Ladyheart a daytoy ket ayat
ta naidumdumat' bitek pusok-agganat,
arigmot' nota ti musika iti barukongko
a mangyeg rag-o a samiweng ti biagko.

Ngem adda gundaway a mapaumelak
no gamdek ipudno kenka 'toy riknak,
masimbalud dilak a kasla agtukiad
bibigko narigat payen a maungap.

Iti panagsabatta iti dalan ti naminsan
naragsakkayo iti lalaki a kaduam,
nagay-ayam panunotko diak mapatangan
ngem impudnom nga isut' asawam.

Rumbeng a maputed innak panagarapaap
ta daytoy a mariknak kenka di maikanatad,
diak kayat a siak ti puon ti pakarakrakan
ti natalna ken naragsak a pamiliam.

Daniw

[nabulod laeng ti ladawan a naaramat iti daniw]

Agngudo ti tawen
Ken maulit a mairugi,
Agnasanas ti ilelennek ti init
Kas iti kalman;
Ngem yegna ti maysa a banag
Kas iti kinapresko ti angin nga angsen-
Yarasaas kadagiti kayo
Wenno nalabit kas maysa a tugot
A minuli ti bukodna nga anniniwan...


tugot
rudyram.rumbaoa
dagiti koleksion a daniw, sarita, kanta, ken dadduma pay

Daniw

Nabulod laeng ti ladawan a naaramat iti daniw

Nagsao ni patay, nababa a tono 
ti boses, nakapsut, di maawatan
a pagsasao; ti laeng makaawat
ti balikas ket dagiti tao
a dumngeg kadagiti awan...



daniw rudy ram. rumbaoa/8.17.2014.maui
dagiti koleksion a daniw, sarita, kanta ken dadduma pay

Daniw

[nabulod laeng ti ladawan a naaramat]

Mayarig iti daniw ti maysa a kamera-
agpartuat ken agala kadagiti ladawan
ket ipempenna iti uneg ti panunot,
tagikuaen ti kararua.
Agbalin a pelikula dagiti balikas
nga awan puot wenno nakem ti lente...

DANIW
-copyright.by.rudy.ram.rumbaoa
 dagiti daniw, sarita, kanta, ken dadduma pay

Biag

[Emeterio T. Rumbaoa]

Biag
ni Rudy Ram. Rumbaoa
Dagiti Koleksiona a Daniw, Sarita, Kanta, ken Dadduma Pay


Nupay aginnadayota, saanto
a pumusay ti panagayatko kenka
ta agnanayon a naitalimengka
ditoy pusok a nakaipempenan
dagiti naimbag nga aramidmo.

Ti ayat kas met kadagiti bituen
a kasapulanna ti pannakaurnos
tapno saan nga agkurkuridemdem
ti panagrimatna iti law-ang,
nupay balinglingen dagiti banag
a pagsiddaawan iti adayo;
ti dadduma a direksion- yugedna ti gasat.

Napateg tunggal kanito a marikna:
liday wenno ragsak, ipapatay wenno gasat
ta mayarigda kas iti katangken ti bato.
Ngem daytoy ti pudno: masapul ti angin
nga angsen gapu ta daytat' pudno a pagbiagantayo.

O, Ama! Anian a ragsak ti agbiag
no ti ayat iti kamaudiananna,
maipeksa-marikna. Awan ngatan
ti napatpateg pay a sagut nga ipaay
no di ti biag manipud kadagitoy
a bendision nga inkam' maawat...

[copyright.by.rudy.ram.rumbaoa]

Venus

nabulod laeng ti ladawan a naaramat iti daniw]

Venus
ni Rudy Ram. Rumbaoa

Asinonto ti makaawat kadagiti misterio?
Ta Isu palikmutanna ti maikadua nga espera
Iti maikatlo nga espera, ket manipud sadiay,
Sumrek ti lawag ni Venus a kas maysa a reyna
Ket madaydayaw ti pagan-anayna kas boda ti nobia
Iti maika-sangapulo ket maysa a bulan, tungpalenna
Ti sirkito, ket ti bagina ipaayna iti lubong a kas maysa 
Kadagiti tallopulo ket pito, ket kadagiti amin
A makaam-ammo ti sikreto ken makaawat kenkuana.
Pabaruenanto ti lubong babaen iti panangipaay ti kinasirib 
Ti Namarsua kenkuana, addanto kappia ken panagdur-as,
Panagsala ken ragragsak, adda kanta ket maidir-i ti rag-o
Ket ti ayat- agsasaipto dagiti sanga ti kayo tapno mangted
Ti linong iti nobio ken nobia. Ket iti panagluom dagiti prutas
Ken dadduma pay a taraon a maipauneg-
"Manipud iti napateg a banag iti prutas ti init,
Ken manipud iti napateg a banag iti apit ti bulan..."

[copyright.2012.by.rudy.ram.rumbaoa]