Panagbaniaga

[Nabulod laeng ti ladawan a naaramat]

PANAGBANIAGA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay


Adayo unayen dagiti aplaya a nagnaam
Ta nadanonmo payen ti sabali nga iking
Ti lubong, ngem ti linikudam a paris ti tugot-
Akupekto ket ilatagko ida iti disso a saan
A mapuyupoy ti angin ket dagiti rekuerdo
Ti nanglunnuyanta 'di bara ti pinagkamang
A rikna, agpitik iti nangtunekanta a kadaratan.

Diak masbaalan, diak matuokan nga agbilang
Iti aldaw nga aglabas uray nalawa ti nagbaetan
A baybay, dagiti surat ti agbalin a rangtay
A mangidanon ti maep-ep-epan nga iliw.
Uray pay nabannayat ti idadaliasat dagiti rabii
Gapu iti panagkarayam ti lamiis, wenno pettat
Ti panunot gaput' pannakaulilak iti kaawanmo,
Agnanayon a yusokko ti singsing iti ramay
A tanda ti kinatarnaw ti sinalimetmetak a kari.

Ket bayat ti panagaksawmo nga agturong iti
Desdes ti masakbayan, iyismagelnak kadagita
Dapanmo tapno iti lugar a mabaddekam,
Madanonko; ti balligi a magun-odmo, dinak
Lipatan, mariknam nga agpitpitikak dita puso.

Ta uray pay kunam nga addakat' adayo
Ta saanko a masagid dagita ima, ti bara
Ti aprosmo wenno saanko a mangngeg
Nga ibalikasmo ti naganko wenno dika makita
Wenno maarakup; asidegkanto latta ti kunak
Agnanayon nga addaka kaniak ta mariknak
A nabuloska kadagiti uratko kas dara, makitaka
Iti panunotko, mangngegka iti lapayagko-

Nga uray kunam a rinibribu a milia ti rukod
Dagiti nadaeg nga aplaya ti pagnaam, patiek,
Taliawen dagiti tugot a mapanawam, subliam
Nga asaken ti desdes a naggapuam a sadiay
Ti pagtabonan ti init, ti linikudam a kalman...


Copyright.by.RudyRam.Rumbaoa.10.4.2015