AYAT TI MAYSA NGA INA

[Nabulod laeng ti ladawan a naaramat iti daniw]

AYAT TI MAYSA NGA INA
Ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com


No dadduma, ti ayat ti maysa nga Ina ket narigat
A mailawlawag ta adda kenkuana ti kaunegan
A debosion, sakripisio ken panagibtur; ta awan

Pagnguddoan, saan a managimbubukod-
Aramidenna ketdit' amin a pagsayaatan ti pamilia
Awan makarpuog wenno makatakaw iti dayta

Nga ik-ikutanna; ngem naanus, naasi ken sindadaan
A mamakawan no adda biddut a maaramid.
Saanna ketdi padpadasen ti mapaay

Uray no iti kaunggan ti puso a mariknana
Ti kasla mapirpirsay. Mamati ket mamatinto latta
Iti labes dagiti nagkaadu a pannakasuotna

Iti nakiro a lubong ti pannakakondena-
Ngem isut' karaniagan ti andap kadagiti amin
A napipintas a banag a makita wenno marikna,

Wenno kadagiti manmano ken karkarna
A masarakan ti klasena a napateg a bato
A kas iti diamante, balitok wenno pirak;

Ngem ti ayat ti Ina ket saan a gangandiong,
Saan a peke no di ket pudno ti naibaklay
Kadagiti abaga nga akmen a responsibilidad;

Nalablabes pay ngem iti itudo a pagrebbengan
Ti ayatna bilang Ina ta karitenna ti amin
A pannakailawlawag iti tunggal makita, masagid

Ken marikna, ngem agtalinaed a sikreto
Kas iti misterio ti nakaparsuaan, wenno kas iti kaadu
Ti kinadayag ken kinangayed a milagro a saanto

Pulos maawatan ti tao ti kaipapananna-
Ta maysa daytoy nga ebidensia a pagsidsiddaawan
Manipud iti kaasi ti Dios iti panangibagnosna ti lubong.


[copyright by rudyram.rumbaoa.5.3.2015]