Teddek ni Filipino iti Hawaii [Lagip ken ni Sakada]

[Nabulod laeng ti ladawan a naaramat. Maysa a buya dagiti nagkauna a sakada ti Hawaii]

Teddek ni Filipino iti Hawaii [Lagip ken ni Sakada]
ni Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
nasurat.12.2006

Naikupinen, Sakada, sabali a pakasaritaan gapuananyo
ti kinasiak, ti pamiliak ken ti sibubukel a Filipino;
manipud Oahu, Big Island, Maui ken Kauai
agraman Lanai ken uray pay ti Molokai.

Kalpasan nasurok sangagasut a tawen, idir-mi ti ragsakmi
sibibiagka iti lagipmi, sikat' gapuanan ken ramutmi;
kalpasan dagiti naglabas a tawen, ikantami iti sangalubongan
ti adu a sakripisioyo kadakami, diminto malipatan.

Dagiti rigatyo iti kapinyaan ken uray iti kaunasan
pinanawanyo a pamilia diyo la ida binaybay-an,
uray rinibu man a milia ti inkay' nagbabaetan
maipaayan laeng napintas ken raniag a masakbayan.

Karamanka latta iti amin a pagsayaatan
dayawendakat' sabali a puli ti sangalubongan,
gapu't ayat, pammateg ken kinamanagparaburmo
mararaem, maitandudo ken umuna latta ni Filipino.

Addan dagiti pasdek nabangon a pakalaglaipam
FilCom Center iti Oahu a pagguummongan,
sabali laeng ti nadaeg a Binhi at Ani
a masarakan iti agdindinamag nga isla ti Maui.

Ket kas pammigbig ti anus ken sakripisiom
naragpatmi ti balligi nga inkam' kadakayo idaton,
wen ta kabaelanmi ti makidinnaeg sabali a puli
a makipagnaed iti Hawaii, ipagtangsitmi.

Naimarkan iti agdama a kaputotan naaramidanyo
kalpasan nasurok sangagasut a tawen nga isasangladyo,
sumarsaruno a henerasion ituloydanto ti narugianyo
tapno iti aramid ken pannao, malagipda ni Filipino!