Kasano Aya A Lipatenka?

Kunam, itanemka ti pannakalipat
tapno aglunit naparnuay a sugat.
Nalaklaka, aya, a pagluniten
panaas 'toy pusok adda pay laeng?

Kasano nga iwaksik ranggas ken ulpit
arigmot' sabidong, agsublisubli't lagip;
kasano, aya, a paragsakek 'toy rikna
nangnamnama kenka ubbaw a sapata?

Kasano, aya, a lipatenka
no addaka laeng iti lagip?

Tunggal umapay ni ridep
ladawam ti an-anninawek,
kasano, aya, a lipatenka
timekmot' maal-allingag
'bagam man, kasano a lipatenka?

Iwaksik nupay pasetkan ti lagip
aniat' rumbeng nga aramidek
no sikat' kanayon a laglagipek?



KASANO AYA A LIPATENKA?
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
*[Aydot.com--Oktubre 31,2006]
copyright [october 2006 by rudyram.rumbaoa*]