Ni Rudy Ram. Rumbaoa
Adda dagiti kanito, Maui, no agmaymaysaak
Sumken ni iliw, dagus nga agarapaapak;
Ngamin diak mapengdan ti panagarubos ti lua
Lumtuaw ladawan dagiti patpatgek, adayoda't denna.
Ngem no makitakan, dagus a tumayab ti riknak
Agdisso diay Laoag, nagtaudak ken dimmakelak;
Agari't ragsak iti pamilia, gagayyem no isuda't madennaak
Ngamin kas kenka, nalatak met ti ili a naggapuak.
Iti isisiplot ti panunotko, Wailuku, establisimientom a kadaanan,
Kayarigam ti Vigan iti umabagatan a paset ti kailukoan;
Ngamin kitikit ti pasdek a binangonmo isut' ebidensiam
Ipasimudaag amin dagitoy ti inka nagrugian.
No iwarasko, wen, no iwarasko Maui ti imatang
Kihei a lugar, adu metten ti inna nagbaliwan;
Ilocos Norte ken Ilocos Sur, adun ti inda nagluposan
Iti mabayag, isudanto't sentro ti negosio iti Kailukoan.
Diak malipatan, Haleakala, idi inulik kangatoan a pasetmo
Tapno maimatangak ti init nga agbannawag dita arpadmo,
Kunak: "Kas met la 'diay bantay-bimmaboy a naguliak
Sangona't karayan Padsan, paglabaan mureng ken pagibilagan."
Kenka Makena, pinaragsakmo met 'toy rikna
Rabaw kadaratam, uray silamolamo agiladda kenka;
Kayarigam diay Pagudpud, batokbatokendaka
Mabang-aran ti rikna iti adu a mabuya!
O Maui, kinayawam a talaga 'toy rikna
Ladawan ti Fort Ilocandia Beach Resort, Lahaina, kas kay la agpada;
Ta makitak agduduma a puli umay agbisita kenka
Ngamin sangailiem ida ket kanayon a malagipdaka.
Narangrang latta ti silaw ti Korean Bar, paglinglingayan a kunada
Iti lugartayo, siksikat ti nagan a Barrio Uno, isu man ti awagda
Ditoy ipapas ti amin nga iliw, rugso a dimo maibturan
Ta ana ngarud, Kaka, agliwliwaka met, a, sagpaminsan!
No agmaymaysaakton iti kuarto a pagyanan
Piman ta kailiwko man unay ni Baket nga agkan,
Ta kadagitoy nga oras, adut' arapaap a mapagsaritaan
Kayatkon sa manen ti agbakasion iti ili a nakayanakan!
[copyright 2006] by rudyram.rumbaoa
*Aydot.com- 8.23.06
___________________
No comments:
Post a Comment