Kaipapanak Kenka

Ni Rudy Ram. Rumbaoa



Tallo gasut ken tallopulo ket innem
nga aldaw ti napalabas, Mayo,
idi pinasingkedam ti kaipapanak kenka
tapno agbalinak a pasetmo
ti ragsak iti biagmo
ti biag ti ayatmo...

Imbuboskot' amin a panawen
tapno siak ti sanggirmo
siak ti pangyasugam
dagiti banag a dimo kabaelan
nga isapulan ti sungbatna.
Inawatnak ket inawatka,
kinawesanka iti pammategko.

Ngem kalpasan nga impaayko ti amin
nagbalinak a nagasang ken saraawmo
a mabalinmo lattan nga iyula iti bibigmo
iti isasangbay ni Hulio ti biagmo.
Kumutukot, Mayo, ti apges
ken ut-ot ti sugat
a mariknak
iti pusok a parnuay
ti panagbalinko a gita
iti pusom...

Naibbatak ti sangarakem
a namnama ti arapaap
ti masakbayan nga insaganak
kayatko nga adda banagen
ti intukitko kenka a bin-i: ti ayat
Ngem pudno a nagbalbaliwkan!

Kaano laeng daydi nga aldaw
a kunam a siak laeng
ti inka samsam-iten,
ngem nagbalinak metten
nga inka papaiten?

Ita, no kunam nga ulbod ti mariknak
gapu't kinapateg ti ayatko kenka
dika piliten a mamati kaniak,
ngem iparipiripko kenka
nga ad-adunto pay
a tallopulo ket innem nga aldaw
ti sumangbay tapno
ipaayna kaniak ti kaipapanak...

[CR.2008.by.rudyram.rumbaoa]
___________________________