Aramid Ti Nalabes Nga Arapaap

Ni Rudy Ram. Rumbaoa



Kas mo pinasaplitan
kinatawaan ken tinupraan
ti bukodmo a bagi,
wenno imbalangat iti ulom
ti korona ni patay;
dagiti rugso ken gartem
a nagpapasam ta umel
ti balikas a mangituray
ket agari latta ti kinaulbod
iti kinataom ken nakem.

Awan buteng
agkatangkatang latta
ti di mapnek a bagi
iti nataoan a tarigagay,
nakullaapanen ti panunot
ket agsublisubli a mangidaknir
ti sulisog ti sardam
ken mangimas ti isarua
a gita ti dila.

A,
Baludnakan ti basol
a nakaipalab-ogam
ket awitmon ti agnanayon
a kalbaryo ti dusam
aginggana't panungpalan;
ngem masullatan ti panagayus
dagitoy a babak iti kararuam
no likkabem ti mansa
a nakaigameram...

Wen, pumusay met
dagiti darepdep nga aramid
ti nalabes nga arapaap.

[CR.2008.by.rudyram.rumbaoa]
__________________________