Ti Pudno A Ragsak

Ni Rudy Ram. Rumbaoa


Masarakan
Ti biag, Maui,
Nga agaun
Iti kinasin-aw ti puso.
Ditoy
Awatenna ti anges
A mangipugso iti ayat
Tapno makita kenkuana
Ti maris ken kinangayed ti aglawlaw...

Saanmon nga ulit-ulitenen, Maui,
Iti nagbalin a kalmanta
Umanayen dagiti balikas
Nga isawang ti bibigmo
A nagbiddutka iti inaramidmo.
Asinoak aya tapno dika mapakawan?

Agyamanak ketdi ta maabisigmo:
Nga awan agbilang a di agpullo.
Maamirismon ti naglabasam
Ti naglabasak
Ti nagbanagan ti ayan-ayat,
Ngem laglagipem kunak manen
A marikna ti pudno a ragsak
Manipud iti kinadalus ti puso...

Dua ti wagas a mangisaknap
Iti ragsak:
Agbalin a silaw
Wenno
Mangiyanninaw kenkuana.

[CR.2008.by.rudyram.rumbaoa]
__________________________