Kambas

Sika ti kambas
Ti biagko,
Kenka maay-ayo
Ti pinsel,
Kenka ipulagidna
Ti pinta ni ayat.

Sika ti kambas
A pangipeksaak
Dagiti im-impenek
Tapno kenka
Makitak ti pakabuklan
Dagiti arapaap
A binukel kaunggak.

Sika ti kambas--
Ti biag
Ti bullalayaw
A napnoan maris
Iti aglawlaw,
'Toy pinsel yugedna
Dagiti dekorasion ti parmata
Yegnat' anges iti ladawan
Tapno agpitik kaipapanan.

Wen,
Sika ti napintas
A kambas
A pagbiagak
Pangipulagidak
'Toy ayat!

KAMBAS

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

www.samiwengkenayatnirudy.blogspot.com

CR.11.09.08.by.rudy.ram.rumbaoa]
_______________________________