Eric ken Zen

ni Rudy Ram. Rumbaoa


DAMOMI pay la'ng ti nagkita ken nagsarita ken ni Eric iti pagobraak, dagus a napugtoak ti kinataona. Maysa daytoy a binabai. Ngamin idi iyam-ammo ni Dennis ni Eric kaniak, medyo pinabangagna ti bosesna idi ibagana ti naganna. Ket idi iyawatna dagiti dakulapna tapno makialamano kaniak, pinetpetak a nairut dagiti ramayna ket uray la nagikkis gapu ngata iti sakitna. Inapputna ti ngiwatna. Ket ditoy a nagkatawaak. "Buking," kunak.

Ngem nupay kasta, ammona met a timbengen ti garaw ti kinataona no adda babbai a mailaok iti grupomi a tallo kada Dennis. Ken ammona met ti agpaseksi wenno agkinnikinni a magna no tallokami ti agsasango. Kasla agrampa ti kayatna nga ipabuya. Kayatna nga ipadlaw a maysa daytoy a binabai kadakami ken ni Dennis. Ngem uray gayam ni Dennis, diak met ipagarup a binabai ti kinatao daytoy ngem pagpintasanna, saan a kas ken ni Eric a sobra unay. Ni Dennis, simple laeng ti gunayna. No adda kursunadana, saan nga agpadlaw, natanang ti garawna. Dagiti matana laeng ti agkuti, saan a kas ken ni Eric nga uray la mapa-ikkis no adda makitana a guapo a lalaki. Ngem iti laksid ti panakaammok iti kinataoda nga agpadpada, nailimed daytoy kadagiti katrabahoanmi a babbai. Ket daytoy ti sipudnan a napintas ti linnangenmi a tallo. No adda papanan ti maysa, agsusurotkami a tallo. Ken gaputa awan pay ti driver's licenseda, kapilitan a siak ti mangimaneho kadakuada no adda kayatda a papanan a lugar.

Ngem nagbaliw a namimpinsan ti ugali ni Eric idi naam-ammona ni Jen, katrabahoanmi met la'ng iti night shift iti Maui Memorial Hospital. Kasla inwagsakna ti kinataona a binabai idi masansan nga agkatrabahoan dagitoy iti maysa a yunit ti ospital. "Ne, agayat san ti loko?" nakunak laeng iti bagik. Ta kadagupan kadakami amin nga agbabarkada a para night shift, makitami a kasla makilaslasinda iti bunggoymi no kasta a malpas ti trabahomi nga agpatnag. Ket nalailo payen ti panakisaritana ken ni Jen no kasta nga agdadanonkami iti lounge. Para kaniak, nasayaat a senyal daytoy tapno agsubli iti naan-anay a kinalalaki ni Eric.

Ket gapu iti daytoy, kasla nagramram nga apuy ti main-inaw a relasionda ken ni Jen. Para ken ni Eric, awan bibiangna iti daytoy. Iyad-addana ketdi ti ar-aramidenna. Saan a mailinged ken ni Jen ti adu a kantiaw manipud kadagiti katrabahoanmi, ket daytoy siguro ti masansan a panaglanganna nga umay agtrabaho tapno maliklikanna ti tsismis maipanggep kadakuada ken ni Eric. Ngem para kaniak, saan a dakes. Baro ni Eric ken balasang ni Jen. Makatulong pay ni Jen iti panagbalbaliw ti kinatao ni Eric. Ngem ti imasna ita, saanen a kas idi ti kaasidegmi a tallo kada Dennis. Kasla umad-adayo ni Eric iti grupomi a tallo.

Maysa ni Marizen, katrabahoanmi met laeng, ti agkursonada ken ni Jen. Ni "Zen" kas naugalian a birngasna, maysa daytoy a tomboy. Amin a garawna, lalaki latta. Uray pay ti panagaruatna. Nupay atiddog ti buokna, ad-adda ketdi a tinggolenna daytoy tapno agparang ti kasla lalaki a langa ken takderna. Kanayon nga umipus-ipus ken ni Jen no kasta a mairana nga agkatrabahoanda iti maysa a yunit.

Malaksid ngamin iti kina-morena ni Jen, natayag daytoy ken napintas. Maibagay kenkuana ti medio pangatiddogen a buokna ken naslag dagiti matana. Naisem pay, kasla dina ammo ti agmisuot. Dagitoy siguro a talugading iti nakaabbukayan ti rikna ni Eric. Ngem idi madlaw ni Eric nga adda plano ni Zen ken ni Jen, kasla ngumirngirngir nga aso ti langana. Kayatna a kittaben dagiti gurong ni Zen no mabalin gapu iti nalaus nga imonna. Ngem iti kas ken ni Zen, narungrungsot daytoy ngem ni Eric. Ni Zen, lalaki ti garawna idinto a ni Eric, binabai.

Masansan nga ibaga no kua ni Laurie ken ni Jen a saanna unay nga as-asitgan ni Eric, ta aginbabakla laeng daytoy. Ngem madlawmi met a kayat ni Jen ni Eric, ta malaksid ti kinalaing ni Eric, guapo pay. Ngem 'suna la'ng ta tsismoso daytoy. 'Ray siak, adda dagiti banag a diak ken ni Eric, managdillaw ken nauyaw kadagiti katrabahoanmi, banag a di magustoan dagiti katrabahoak. Nalaing pay a sumao ngem no iti aramid, awanen.

Ngem di met paabak ni Zen. Lalaki latta ti pustorana nga agarem. Sagutanna pay ni Jen kadagiti tsokolate ken rosas a di maaramid ni Eric. Daytoy ti gapuna a pagduduaak ni Eric no pudno met laeng nga agayat ken ni Jen. Wenno ar-aramatenna la'ng ni Jen para iti personal nga interestna. No ana dayta, dimi ammo.

ITI naminsan a panag-window shoppingko iti Queen Kaahumanu Shopping Center iti maysa malem ti Sabado, nakitak ni Jen iti food arcade. Idi damo, diak malasin ta sabali gayam ti langana no saan a naka-uniporme iti scrub. Ad-adda a pimmintas iti panagkitak. Adda kaduana a lalaki. Saan met ngarud a ni Eric. Baro a rupa para kaniak ta idi la'ng a makitak daytoy. Atapek a boyfrienda. Diak nagpadlaw nga immasideg iti lugar a nagtugawanda. Nagtugawak iti adayo bassit a likud ni Jen tapno nalawag a makitak ti misterioso a lalaki a kasangsangona. Nalailo ti panakisarita ti lalaki banag a daytoy ti mangpasingked ti atapko a boyfriendna. Di mabayag, timmakederen dagitoy a pimmanaw. Amangan ketdi no nadlawdak? nakunak laeng. Binuybuyak ngarud ti iyaadayoda. Pagammuamta sinallabay ti lalaki ti abaga ni Jen. Nalpas! nakunak. Pudno ti atapko, boyfriend ni Jen ti lalaki.

"Ana't makunam iti ar-aramiden ni Eric?" sinaludsod ni Dennis kaniak idi agkitakami iti pagobraan iti karabianna.

"Dehado," insungbatko. Ngimmato ti kidayna a masmasdaaw. "Panagkunak, marigatan ni Eric," intuloyko. Kunak daytoy gapu iti nakitak. Ngem awan pay ebidensiak no pudno ti naimatangak a boyfriend ni Jen ti lalaki a nakitak iti food arcade ti Queen Kaahumanu Shopping Center. Diak imbaga ti nakitak ken ni Dennis.

'Pay koma ket mayat sa met ni Jen?" sinaludsodna laeng.

Nagwingiwingak. "Urayenta ti agbalin a resultana. Narigat ti agsao ita," kunak.

"Panagkunam, makatulong ngata ken ni Eric ti ar-armidenna?" ni Dennis.

"Wen. Dakkel a banag a makatulong ti panagaremna ken ni Jen ta mamatiak a daytoy ti mangibaw-ing ti kinataona a binabai nga agbalin a pudno a lalaki. Ngem maaramid la siguro daytoy no di masaktan ti rikna ni Eric," inlawlawagko.

"'Na't kayatmo a sawen?" inimtuodna. "Diak maawatan ti kayatmo nga ilawlawag."

"Maawatamto no adda maduktalam. Saan ngata pay nga ita, ngem addanto tiempo. Sika, binabaika. Awan kad' met ti planom nga agbalin a pudno a lalaki?" binaliwak ti turong ti pagsarsaritaanmi.

Immisem laeng daytoy ket nagwingiwing. "I was born to be handsome, but my feelings is not for the ladies. It is for the boys, what can I do? Ayyy!" kunana nga umarutittit.

Nagkatawaak nga immadayo.

DAY-OFF ni Eric iti dayta a rabii ti Mierkules. Agkatrabahoanda Jen ken Zen. Perme ti ragragsak ni Zen ta awan ti karibalna. Mabalinna nga aramiden amin a kayatna ken ni Jen. Ngem para ken ni Jen, dina kayat ni Zen. Ammona a tomboy daytoy. Awan ti sumngar a riknana iti padana a babai. Imbagana kaniakon daytoy iti naminsan a nagsaritakami iti lounge. "Ana koma ti maganabko ken mariknak no patulak ti padak a babai?" dagitoy ti nabagas nga imbagana. "No adda sungbatak kadakuada, kaykayatko ti lalaki," kunana. Ngem imbagana daytoy idi sakbay iti panakakitak kadakuada iti lalaki iti food arcade.

Para ken ni Zen, diak ammo no serioso daytoy ken ni Jen. No maminsan, adda katintinnawagna iti cellphonena. Ngem segun kadagiti nakalapko a tsismis, adda girlfriendna. Kunada a medyo addan edad ti girlfriendna. Diak ammo no agpayso. No pudno man daytoy, ania ngarud ti paginteresanna ken ni Jen, nagsinada kadin iti girlfriendna? Wenno, pagay-ayamanna laeng daytoy?" diak ammo ngem mabistokto latta.

Aldaw ti Huwebes, nagday-off met ni Zen. Mabukodan met ni Eric ni Jen ita, nakunak. Ket agpayso, iti panakadanonko kadakuada ken ni Jen iti lounge, sabali ti makitak a ragsak ni Eric iti dayta a kanito. "Addan sa nagkinnaawatandan," kunak iti bagik. Nagclock-inak sakbay a rimmuarak iti lounge a nagturong iti yunit a papanak. Iti kabigatanna, nadanonko manen ida nga immuna iti lounge. Ad-adda ti siddaawko, agpayson sa ket ti atapko, ngem asino ti lalaki a nakitak iti food arcade?" di maiwaksi dayta a saludsod kaniak.

BIGAT ti Domingo, kiniddaw ni Dennis nga inkam' agwalay idiay Maui Mall. Siempre, siak ti agmaneho ngem kiniddawko kenkuana nga ayabanna ni Eric tapno napinpintas met la'ng ti grupomi. Ket adda kayatko a takkuaten kenkuana. Idi damo, nagpambar ni Eric ken ni Dennis nga adda importante a turongenna iti dayta nga aldaw. Ngem di agangay, napasurotmi met la'ng. Apaman a nakadanonkami iti Mall, iti pagtagilakuan a kawes ti lallaki ti tinurong ni Eric. Nagkinnitakami ken ni Dennis. Naginnisemkami. Idi magatang ni Eric ti kayatna a gatangen, napankami met iti paglakuan a kawes dagiti babbai. Ni Dennis met ti simmublat a nagpili. Kalpasanna, nagpagnapanakami.

"Wen gayam, 'Day. Komusta met ni Jen?" saan a naibturan ni Dennis iti nagsaludsod ken ni Eric.

"Nas'yaat met. Ken no mabalin aya, dinak awagan ti 'Day? Eric lattan!" pinabangagna ti bosesna.

"Ay sori, a! 'Pay gayyem, talaga kadin a nagbalbaliwkan? Saankan a kaburik?" kuna ni Dennis kenkuana.

Immisem ni Eric. Diak nagtagari ta kayatko a denggen ti pagtungtongan dagitoy dua. "Feelko my friend, itultuloykon ti narugiak. Kayatko ti "umiba." Kayatko a ma-feel ti marikna ti pudno a lalaki," insungbatna ken ni Dennis.

"No kasta, pudno ti damagmi a nagaremka ken ni Jen?"

"Wen. Diak kayat ti agulbod kadakayo ngem feelingko, agayatak ken ni Jen," kunana. Ngem limmidem ti rupana 'di agangay.

"'Pay?" sinaludsod ni Dennis.

"Adda problemak," kunana. "Adda kaduak nga agar-arem kenkuana, ni Zen. Ti babai'toyen!" nagrupanget ti rupana.

Simmampitawak. "'Pay problemam ni Zen ket babai met kas ken ni Jen. Ti pagammom ngata, kayat ni Jen ni Zen?" sinaludsodko.

"Ditay' maibaga ti kasta, gayyem," kunana kaniak. "Diak marikna ti marikrikna ni Jen. Ngem nupay kasta, sport-tak met no kastoy a banag ti pagsasaritaan. May the best men win," imbinsabinsana.

Nagkinnitakami ken ni Dennis. Immisemkami iti nalimed. Iti panunotko, kayatko koma nga ipudno ken ni Eric ti nakitak a lalaki a kadua ni Jen. Ngem apay koma? kunak. Diak kayat ti makibiang iti love interest daytoy. Bay-ak nga isunto ti mangduktal no adda kinapudnona a boyfriend ni Jen ti lalaki a nakitak a kaduana.

Umaldawen idi agawisda nga inkam' mangaldaw. Tinurongmi ti Queen Kaahumanu Shopping Center. Dagus a nagtugawkami iti food arcade. Ni Dennis ti akimbatang a napan nagorder iti pangaldawmi. Sinsintirek ni Eric no adda kayatna nga ibaga mainaig iti love proposalna ken ni Jen. Ngem naulimek daytoy kabayatan iti panangbidingbidingna ti iggemna a cellphone. Makite-text, kunak. Binay-ak. Ngem anian a kigtotko idi makitak a sumungsungad ni Jen. Kaduana ti lalaki a kunak. Agturongda iti food arcade. Diak nagpadlaw ken ni Eric ta busy iti cellphonena. Pinayapayak ni Jen ket nakitanak. Uray la nasdaaw idi makitana ni Eric a sumangsango kaniak. Saan a makita ni Eric ta nakalikud ken ni Jen. Gamden koma da Jen ti agsubli, ngem naladawen. Kapilitan nga immasideg iti ayanmi ken ni Eric. Apagisu met idin nga adda ni Dennis a napan gimmatang iti pangaldawmi. Nasdaaw met daytoy iti apagapaman iti nakitana.

"Hi, Jen!" inkablaaw ni Dennis. Di ipagarup ni Eric nga adda ni Jen ken ti kaduana a lalaki iti likudanna. "Boyfriendmo?" intudo ni Dennis ti kaduana a lalaki.

Immisem laeng iti apagbingi ni Jen sa nagtung-ed. Nalpas! kunak. Kasla nailabeg met ni Eric iti naimatanganna. Kasla di mamati. Di payen makatimek nupay nalaing daytoy a sumao.

"Mayatman ti grupoyo a tallo," kuna ni Jen. "One for all, all for one! Wen gayam, isu ni Karl, boyfriendko. Ni Dennis, Eric ken Martin," inyam-ammonakami iti boyfriendna. "Sige, enjoy your lunch!" ket inawisnan ti boyfriendna a napan nagorder ti kanenda.

Iti suli dagiti matak, makitak latta ti nalaus a panagimon ni Eric babaen iti ekspresion ti rupana. Napanganga lattan a nangbuya iti iyaadayo dagiti dua. Ngem ana ngarud ti mabalinna, boyfriendna ti kinakuyogna.

MANIPUD iti daydi a panakakita ni Eric iti boyfriend ni Jen, saanen a kas iti dati. Kasla nanglaylay a sabong ti langana. Saanda payen nga agkatrabahoan ken ni Jen iti maysa yunit. Siguro, kiniddawna iti scheduling supervisormi a baliwanna ti yunit a pakaidestinoanna, kunak. Ngem idi agangay, nagbaliw ti shift a panagobrana. Day-shift metten! Ket gapu iti daytoy, atapek a riniknana unay ti nakitana ken ti kaaddan ti boyfriend ni Jen. Ti kayatko ketdi nga urayen no agsubli daytoy iti binabai a kinataona. Ngem awan ti naurayko.

Agar-arimukamok ti dayta a rabii ti Lunes. Ugalik pay la'ng no kua ti agistambay iti luganko iti parkingan ti Maui Memorial Hospital sakbay a sumrekak iti pagtrabahoak. Agkapeak ken agsigarilio. Napalabas ngatan ti lima a minutos idi adda mapasungadak a lugan. Ni Zen. Idi maisimpana ti luganna iti parkingan, dagus a simrek iti uneg ti ospital. Nasdaawak. Iti unegko, baka naammuannan nga adda boyfriend ni Jen, kunak. Idi maigupkon ti kape, nagdardarasak a simrek iti ospital. Kayatko a mammuan ken ni Zen no naduktannan ti kinapudno.

Diak nakita daytoy iti lounge ngem atapek a nagturongen iti yunit a pagtrabahoanna. Da Laurie, MJ ken Vangie ketdi ti nadanonko iti lounge. Nagsaludsodak kadakuada no nakitada ni Zen a simrek iti lounge. Ngem 'suda ketdi ti nagsaludsod kaniak. Dinamagda no pudno nga addan boyfriend ni Jen. Nagtung-edak. Imbagada a pimmanaw a dagus ni Zen iti lounge kalpasan a nagclock-in daytoy. Kunada pay a kasla agpupungtot. Atapen met dagiti katrabahoak a naammuanen ni Zen ti maipanggep iti boyfriend ni Jen.

DATI, nasarangsang ti panakisarsarita ni Zen kaniak, nangruna no babbai ti pagsasaritaan. Ngem kalpsan iti panakduktalna nga adda boyfriend ni Jen, kasla limmamiisen ti panakisaritana kaniak. No dadduma, kasla mapilpilit payen a mangsungbat kadagiti saludsodko. Iti nakemko, biktima met daytoy iti ayat. Ngem diak gamden ti agsaludsod iti maipanggep ti ayat. Bay-ak latta ida ken ni Eric a mangsolbar iti problemada. Ngem ti imasna, kalikaguman ni Eric ti agbalbaliw. Kayatna a punasen ti binabai a kinataona, ngem daksanggasat ta napaay. Kayatko koma a bagbagaan nga intuloyna latta ti panggepna nga agbalbaliw, ngem kadarato metten a makitak. Patiek, ay-ayatenna ni Jen ket ar-aramatenna daytoy kas inspirasionna para iti nairuginan a panagbalbaliw. Kasunganina ni Zen, babai ti kinataona ngem ti rikna daytoy ket lalaki.

MAKABULAN kalpasan ti naudi a panagkukuyogmi kada Eric ken Dennis iti food arcade ti Queen Kaahumanu Shopping Center, awanen ti damagko kada Eric ken Zen. Ta uray ni Zen, day-shift metten ti pagobraanna. No iladawanko dagiti napasamak kadagiti dua, desperadoda ken ni ayat. Kinaykayatdan ti agtrabaho iti pangaldaw imbes nga iti rabii a paggugustoda idi. Ngem ana ngarud no isu ti kayatda.

Ag-birthday ni Eric iti sumaruno nga aldaw. Inawisko ni Dennis a mapankami gumatang iti kumporme ditan nga iregalomi iti gayyemmi. Wen kunak ken ni Dennis, kadagitoy a tiempo ti panakasapul ni Eric kadata. Kasapulanna ti mangliwliwa kenkuana. Ket kalpasanna, gimmatangkami iti karne ti baboy ken baka ken ikan nga itunomi iti kaaldawan ti kasangay daytoy. Addan nakasagana a planok iti dayta nga aldaw a panagkasangay ni Eric. Diak imbaga ken ni Dennis. Diak kayat a mapalpak daytoy.

Aldaw ti kasangay ni Eric, nasapaak a napan iti balayda Dennis. Dagasek isuna kalpasanna, aglayonkaminton iti balayda Eric iti Maui Lani. Awan ti naimbitaran kadagiti katrabahoanmi, malaksid laeng ken ni Zen ta kayatko ida a kasarita ken ni Eric.

Agalas sieten idi adda maitimkak a boses iti ruar ti balayda Eric. Manarimaan ti panagtunomi iti likud ti balay. Baka ni Zen dayta, kunak. Siak ti nagboluntario a napan mangkita iti bisita. Sa maysa pay, diak imbaga kadakuada a dua nga inimbitarak ni Zen tapno di maperdi ti planok. Ket anian a siddaawko idi makitak ni Zen! Nakapinpintas met ti panagkitak kenkuanana iti dayta a rabii. Ti lalaki a pustora ken panagarruatna idi, saan metten ta nagbistida daytoy iti apagattumeng. Sa maysa pay, nagwakrayen ti buokna. Ket diak ipagarup a kasta ti kaatiddog ti buokna ta dumanon met gayam iti labes ti abaga. Pinastrekko ni Zen. Intudok nga addakami iti likud ti balay. Immisem laeng daytoy.

Intulagko ken ni Zen a di pay la'ng agpakpakita kada Dennis ken Eric ta siak ti mangibaga. Para kaniak, kayatko a masorpresada.

"'Sin' didiay?" sinaludsod ni Dennis kaniak.

"Maysa a gayyem. Dati a katrabahoantayo iti rabii," insungbatko nga umis-isem.

"Awisem ketdi ditoyen ta rugiantayon. Sayang ti rabii no agmiminnulagatayo latta!" ni Eric.

Pudno ti kuna ni Eric, sayang ti rabii no awan ti mapasamak a nas'yaat. Ken panagkunak, agmulagatka ita, kunak. "Adda surprise giftko kenka, Eric," imbagak kenkuana.

"Ay apo, Martin, nakaad-adu unay nga artem. 'Yabam ketdin 'la!" imbugtakna kaniak.

"Tumalikudkay' pay nga umuna ken ni Dennis tapno adda suspensena. Alan!" binilinko ida. Awan naaramidanda a dua. Kapilitan a timmalikudda. "No ibagak a sumangokayton ditoy, sumango kayo, wen?"

"Ala wen," ni Eric.

Pinayapayak ni Zen nga umay iti abayko. "Okey, mabalinyon ti kumita ditoy," kunak.

Kasta unay ti siddaawda nga agpadpada. Kasla di mamati ni Dennis. Nailabeg met ni Eric.

"O, ania ti makunayo iti balasangko?" inyangawko kadakuada.

"Gaga! Napinpintaska met gayam ngem siak," ni Dennis.

Ngem ni Eric, napatunganga pay la'ng. Sabali ketdi ti nagrehistro iti panunotko, "Agayat sa met manen daytoy a bakla, a? nakunak. Ngem para kaniak, kayatko met. Dayta ngarud ti gapuna nga inawisko daytoy a tomboy. Daytoy pay ti paset ti planok no kasano a mapagbalbaliwko ida.

"'Pay kasta ti panagkitam kaniak," kuna ni Zen ken ni Eric. "Kayatmo ta danogenka?" inlayatna ti gemgemna ken ni Eric.

"Ne, saan a!" Peace na tayo," immisem ni Eric ket inasitganna ni Zen.

Saan met a nagtukiad ni Zen idi iggaman ni Eric ti dakulapna. "Umayka ditoy ta rugiantayon ti mangan," immisem.

"Happy Birthday!" kinablaawan ni Zen.

"Thanks, ha? Imbag ta nakaumayka," pinerrengna ni Zen.

"Ni Martin ti nangimbita kaniak," tinaliawnak.

"Sika, a! Dimo la imbaga ti planom. Ngem thank you manen, Zen!" nalangton ti langa ni Eric.

Nagkinnitakami ken ni Dennis. Masolbaren ti problema, immisemak a nangtaliaw kada Zen ken Eric.

Ni payen Eric ti nangted iti natuno a barbeque ken ni Zen. "Agsarita no madamdama, wen?" naturay ti bosesna. Nagkinnitakami ken ni Dennis ket dimin inuray ti "madamdama" a kiddaw ni Eric. Sinenyasak ni Dennis tapno umadayokami pay laeng iti ayanda. Ken, tapno maibaga ni Eric ti kayatna nga ibuksilan ken ni Zen.*

[copyright.by.rudy.ram.rumbaoa/naiposte iti iluko.com-12.10.06]
_______________________________________________________________