Makirelasion ken ni Jesus

ni Rudy Ram. Rumbaoa


ADU dagiti tattao iti saan a makaammo no kasano nga irugi iti panakirelasionda ken ni Jesus. Masansan a marikna dagitoy a tattao nga awitda ti padeppa iti kalbaryo ti adu a responsibilidad. Dagiti dadduma, makarikna iti panagbabawi iti amin a naaramidda a kamali wenno biddut. Arigna a mapilpilit dagitoy a tattao a mangawat iti balikas ti Dios nga agtaeng koma iti pusoda. Dagiti dadduma, agngatangata ken mayaw-awan ti panunotda.

Ngem ti kapintasan a banag nga aramiden tapno mabangon ti natibker a relasion ken ni Jesus ket isu ti panagtalek ken kaadda iti pammati Kenkuana. Agdawatka iti kaasina. Ta no adda kenka dagitoy iti uray sadino man a papanam, wenno kasano iti kaadayo ti napanam wenno nagtengam, adda latta nga agnanayon a sumaranay kenka kadagiti pannubok nga inka paglasatan. Dika bumdeng a sumaranget kadagiti karit. No adda panakapaay, adda met panagballigi. Adda latta iti sangnguanan, sikigan wenno likudan a nakasagana a tumulong kenka. No adda biddut a naaramidam, agbabawika.

Ti panakirelasion iti Dios ket kas met iti panakirelasion iti ay-ayaten. Adda dua a parte ti panakirelasion. Ti umuna, ti panakipaset ti Dios kenka. Ti sabali, isu ti panakipasetmo Kenkuana.

Inaldaw nga ipaay kadatayo ti Dios ti panakipasetna babaen iti panangipalubosna nga agriing, bumangon ken agbiag iti agdama. Daytoy ket naindaklan a sagut ti Dios. Inted ti Dios ti sagut iti biag ket aniaman ti mabalin nga aramiden, aramidentayo gapu iti pagayatanna.

Nakasimsimple. Dawaten ken ni Jesus nga agtaeng iti puso ken mamati Kenkuana a tulongannaka. Ikidem dagiti mata, agtamed ken awaten ni Jesus a kas Apo ken Mangisalakan kenka. Ngem dika koma mangnamnama nga insigida nga agbalbaliw ti amin no agdawatka. Adda naituding nga oras ken tiempo nga ipaayna kenka ti kaasina. Awan ti mahika a mapasamak. Ngem maaramid daytoy iti pagayatan ti Dios.

Daytoy a banag ket kas met iti panagmula iti bukel ken panagsibug iti mula, kasta ti panagimula ti Dios iti bukel kadatayo. Umuna nga agpang iti panangawat ken ni Jesus a kas Apo ken Mangisalakan. Ket manipud ditoy, adu dagiti banag ti posible a mapasamak.

Ti panakirelasion iti ay-ayaten, kasta met ti panagayat ni Jesus kadatayo. Ibilangnatayo a kas kameng ti pamiliana. Ngem masapul nga ayatentayo Isuna a kas miembro ti pamiliatayo.

Iti panakisarita kadagiti miembro ti pamilia, adda koma met itedtayo a tiempo a panakisarita ken ni Jesus. No kabalinantayo nga ibusen ti oras a panakidenna iti pamilia gaputa ay-ayaten ken ipatpategtayo ida, maaramidtayo koma met ken ni Jesus.

Kas annak ti Namarsua, maawatantayo met ti nagkaadu a komplikasion ken ti kinakiro dagiti bambanag a karaman ditoy dagiti nadumaduma a sekta ken relihion nga agtaud iti agdama. Saan koma a dagitoy ti manglibeg iti panunot. Saandaka a maisalakan dagitoy a klase ti sekta wenno relrelihion. Sika a mismo ti makaisalakan iti bukodmo a bagi ken kararua babaen iti panangaramidmo iti pagayatan ti Dios. No kayatmo ti makapantok iti kangatuan a bantay, masapul a mangrugika a magna iti sakaananna ket in-inutka nga umuli nga agpangato.

No ditayo ikaso dagiti nagkaadu a komplikasion ken dagiti isyu a mabalin a pagsasaritaan a karaman iti daytoy simple nga akto ti ayat, kasano ngarud a marugian iti panakirelasion ken ni Jesus?

Awan ti adu nga espesial ken nariknut nga aramiden. Simple, irugi babaen iti panagdawat Kenkuana nga agtaeng kenka-- iti puso. Ket manipud ditoy, in-inut ti panakabangon ti kongkreto a relasion ken ni Jesus. Ta kas met iti agipatakder iti balay, masapul a mabuhosan ti pundasion tapno ditoy ti pagsadagan ken pagrugian ti mapatakder nga adigi ti pagtaengan.

Ket no adda panagduadua iti amin wenno ania ti kinapudno a kayatmo nga isapulan ti sungbatna, simple, agdamag. Damagen iti Dios ta ipakitana Kenka ti pudno ken ti dalan. Awan ti mailemmeng Kenkuana. Nakasagana iti agnanayon ta Isu ti biag, ti pudno ken ti dalan.

Awan ngatan ti kapintasan ken sabali a kayat nga aramiden ti maysa a tao ditoy lubong no di ti maaddaan iti relasion ken ni Jesus. Kayat ni Jesus a pasettayo met Kenkuana.**

[copyright.by.rudy.ram.rumbaoa/immuna a naiposte iti iluko.com-12.19.08]
____________________________________