Kakibinkonto Latta

ni Rudy Ram. Rumbaoa


Dinto aglibak
napeknekanen ti panawen
a pasetka
nayuged a pakasaritaan
iti pusok kansionka
kadagiti baro nga agsapa
a taluntonek.
Dagiti allon a mangsabuag
iti barukongko
mayarkos naganmo a kas ulep
ti apagbingi nga isemmo
makitak kadagiti parparmatak
ket lumtuaw ladawam
iti agpakadan a malem.
Wen, dinto malibak
a kakibinkonto latta
dagiti arapaap,
dagiti balligik iti maputar
a daniw ti biag
iti kaunggan a kalikagummo
amin dagitoy isagutko kenka
a ray-aw ti kararuak.

[CR.2008.by.rudyram.rumbaoa]
____________________________