"Ne, Viagra daytoy, adda kadi itdenna a pagimbagan dagiti babbai nga agus-usar iti antidepressants?"
MAKAUPAY ti epekto ti viagra kadagiti babbai, ngem iti kabaroanan a panagadal, naduktalan nga adda pagimbaganna kadagiti [babbai] nga agus-usar iti antidepressants.
Naduktalan iti panagsukisok a nakairaman ti agarup 98 a premenopausal a babbai nga agkuna a makatulong ti viagra kadakuada a mangrikna ti alimpatok ti ragsak. Ngem daytoy a panagsukisok ken saan nga iraman iti sabali nga aspeto ti panakinaig kas koma ti tarigagay. Iti inrakurak ti Journal of the American Medical Association, dagiti babbai nga agusar iti antidepressants nga addaan iti problema ti alimpatok ni ragsak, makatulong met daytoy a mangbang-ar kadakuada. Kuna ni Stanley Althof, psychologist ken director of the Center for Marital and Sexual Health ti West Palm Beach, a makatulong daytoy a dumanon iti alimpatok ngem saanna a pagdur-asen ti tarigagay wenno panakagargari ti rikna ti maseknan.
Sumngat wenno makibiang ti antidepressants iti panagimaneho ti seks ken aramid uray pay makuna a makatulong ti agas a mangpukaw ti dipresion. Makatulong ti panagsinnukat wenno mangibaba iti bilang ti agas nga ipauneg, ngem adu dagiti tattao, lallaki ken babbai ti nagisardeng nga agusar gapu iti itdenna a sexual side effects.
Komon dagitoy a reklamo. Naduktalan iti sakbay ti panagadal a nasurok a kagudua dagiti tattao nga agipapauneg iti antidepressants ti nakapataud iti problema ti seksual, nangruna kadagiti nagaramaten iti prozac, paxil, celexa ken sabsabali pay nga agas nga agtrabaho a mangingato ti chemical serotonin iti utek. Ti serotonin ket maipagarup nga ibannayatna ti alimpatok ti ragsak, nalabit gapu iti panangruk-at ti sabali pay a kemikal iti utek --ti dopamine. Paaduen ti viagra ti dara nga agayus nga agturong iti mabagbagi ti tao.
Kuna ti panakangiwat ti Pfizer Inc. Sally Beatty nga awan plano ti kompania a mangipursigi iti inaprobaranen ti Food and Drug Administration [FDA] a panagaramat iti viagra a pagagas iti female sexual dysfunction. Insardeng ti kompania ti internal research iti viagra para kadagiti babbai idi 2004. Nupay naduktalan a natalged ti viagra, saan a makapnek daytoy kadakuada.
Ti panakadiskobre ti viagra ket maysa a milestone iti benneg ti medisina, ngem kabaligtad daytoy iti panakadismaya dagiti babbai isu't gapuna nga insubli ti Food and Drug Administration ti Testosterone Patch tapno mapagadalan a naimbag ti kinatalgedna. Sabali laeng ti handheld vacuum device nga inaprobaran ti FDA a mangpaadu iti dara nga agayus iti clitoris, ken ti BioSante Pharmaceuticals, Inc. iti panakasubok ti testosterone gel a maawagan iti LibiGel.
Ti baro a duktal iti viagra ket basar iti walo a lawas nga eksperimento. Balligi ti panagusar dagitoy 98 a babbai iti antidepressants ngem addaanda iti problema ti seksual. Agtawen dagiti babbai iti 37. Immannugot dagiti babbai a makinaig iti maminsan iti maysa a lawas. No makinaigda, ipaunegda ti pildoras ngem dida ammo no daytoy ket viagra wenno maysa a matching dummy pill.
Nairakurak nga adda nagdur-asanna iti overall scale ti agarup pitopulo ket dua a porsiento a babbai a nagipauneg iti viagra, idinto nga adda laeng beinte siete a porsiento iti maipagarup nga adda nagdur-asanna manipud iti ipaunegda a placebo.
Kinuna ni Althof nga adda pagdanagan iti daytoy naisayangkat nga eksperimento gapu ta adda 43 a porsiento kadagiti babbai a nagipauneg iti viagra ti nakaekspiriensa iti sakit ti ulo no ikumpera iti 27 a porsiento a nagipauneg iti dummy pills. Nairakurak a masintir pay ti panagtaud iti saan a panakatunaw ken panaglabbaga iti kudil dagitoy nagaramat iti viagra.
Iti biang ni Psychologist Leonore Tiefer ti New York University School of Medicine, kunana ti panagsukisok a pinunduan ti industria ti Pfizer nga iladawanda iti daytoy nga eksperimento a sobra unay a palakaen ti ekspiriensa dagiti babbai iti seks. Naobserbarna pay ti baro a panagadal nga ad-adu ti side effects nga itdenna ngem iti pagimbagan.
Kadagiti imun-una a panagadal, naduktalan a naipaayan ti pagimbagan dagiti lallaki a nagipauneg iti viagra no ikumpera iti naduktalan a pagsayaatan a para kadagiti babbai. Ngem adda mensahe para kadagiti lallaki ken babbai nga agkasapulan iti antidepressants a makatulong ti viagra nga agtalinaed iti dayta nga agas.
Awan ti impluensia ti Pfizer iti panakadisenio, panangduktal, wenno panagirakurak iti ania man nga agbalin a resulta ti eksperimento.*
____________________________________
No comments:
Post a Comment