ITI amin a klase ken langa ti sakit iti panunot, nasken unay ti panakapatanor ti naragsak a panagkita iti biag.
Adut' masakit a kasla ubbing ti riknada para kadakuada uray no dagitoyen ket nataengan. Maluksawda no saanda a magun-od ti kayatda a gun-oden. Saan koman nga inuubing ti panagpampanunot dagiti nataengan. Ta kinapudnona, saan a kanayon a maaramidtayo dagiti banag a kas iti kayattayo idi ubbingtay' pay laeng. Masapul a sursuroentayo ti makidanggay kadagiti sabali a tattao, uray pay makuna nga aggigiddiat 'ti kapanunotantayo. Nalaka unay ti agaramid kadagiti biddut a mamataud iti kina-irteng kadagiti riknatayo, ket dagitoy ti mangted ti riribuk iti bukodtayo a panunot.
Katawa ken panangipalubos nga aglua ti maysa a tao ti kasamayan nga agas ti panakasaaw ken panakaupay. Dagitoy ti nalawag nga insagana ti nakaparsuaan a mamaglukay kadagiti nairteng a rikna ken mangisubli kadatayo iti kadawyan ken gagangay a kita ti panagbiag.
Dikay' pay napaliiw aya a narigat nga agkatawa ken agsangit ti maysa a tao a napalalo unay ti panakapulpulkokna? Mabalin a padasenna, ngem mapilpilit dayta a rikna, nalabit gaputa, ti la kabukbukodanna a panakapaay ti pampanunotenna. No 'tay tao ket isut' managatap, mabalin a padasenna a rukoden dagiti panagem ti sabali iti aglawlaw wenno aglikmutna.
Adu dagiti kakastoy a tattao iti agdama, puera delos buenos, ti addaan iti nakakaskasdaaw a lagip. Saanda a malipatan uray dagiti babassit a banag. Mapaliiw pay a siaannad ken maiyuloda pay ti amin a naliday a napasamakda, santo ket manayonan. Dagitoy a pagilasinan ti mangibaga nga adda naun-uneg a kita ti panakariribuk ti panunot wenno isipda. Masapulda ngarud ti tulong a mabalin laeng nga itden ti maysa a panagadal iti kasasaad ken panagtaray ti panunot ken ti isip.
Dagitoy a tattao ti saan a paidalan laeng kadagiti agdadamo wenno agsursuro. Nakakaskasdaaw a banag ti nasayaat a lagip wenno tanda, ngem adda met dagiti tiempo ti panakalipat. Saan a nalaka daytoy a banag, aglalo no ti tao ket nadangran, nadisgrasia wenno nasugat. Ngem no kayattayo a nanamen ti nasayaat a salun-at, mabalin ngata nga adda dagiti banag a rumbeng ken masapul a lipatan.
Napaliiw a kaaduan nga agsagaba iti kastoy a sakit ti mangpampanunot laeng kadagiti bukodda a bagi. Saan a nakakaskasdaaw daytoy. Addaantayo amin iti kasta a karirikna, ngem aramaten dagitoy a tattao ti agparang a pagilasinan iti sakitda kas ti panagsarua, sakit ti ulo, ken napardas a panagpitik ti pusoda a manggun-od iti kayatda a gun-oden. Mabalin a saanda a bigbigen ti agdama nga ar-aramidenda, ngem pilitenda dagiti kameng ti kaamaan wenno pamiliada a sumurot iti pagayatanda.
Ket kamaudianna, agbanagto daytoy nga awan ti ragsak ngem ketdi, agtuokda amin. Adda dagiti tattao a tumulong kadagiti pada a parsua, ket iti panangaramidda iti daytoy, magun-odda ti sabali a rukod wenno tukad ti naimballigian a panagbiag.
Maysa kadagiti kapatgan a banag wenno gameng a makupikopan ti tao iti biag ket isu ti kaadda ti sangkabassit nga innangaw wenno pagkakatawaan a banag. No masursurotayo ti agkatawa, uray saan a nakakatkatawa, ket malipatantayo iti apagapaman a kinatuok ti biag, makuna a mabalintayo a parmeken dagita a riribuktayo. Saan a kanayon a magun-odtayo ti kayattayo a gun-oden, ket uray no daytoy ket mabalin a makaiburay iti pagimbagantayo para iti masakbayan. Adu dagiti mabalintayo a pagyamanan, uray no adda panakaupay.
Kas iti sabong, masansan a dayta a sabong a mabungon kadagiti siit ti panakaupay. Saantayo a basta alaen ti maysa a banag satayo ibati iti sabali. Isut' gapuna nga agtaeng koma ti ragsak uray adda panakaupay. Dakkelto a banag ti ipaay ti espiritu a mangagas iti isip ken ti bagi.
Makigayyemtayo.
Makatulong ti panagbasa kadagiti nasayaat a klase ti libro a manglipat ti panakapaay ken panakaupaytayo.
Parang-ayentayo ketdi ti pammati iti masakbayan. Iti tengnga ti adu a pakariribukan, sitetengngel pay laeng ti Dios iti timon. Isu pay laeng ti agturay, saan laeng a kadagiti biang dagiti nasion, no di pay ket ti biagtayo. Ammona ti kaimbagan nga agpaay iti tumunggal maysa kadatayo. *
__________________________________________
No comments:
Post a Comment