Kakabsat ken Gagayyem

[Nabulod ti ladawan a naaramat]

timmakder ken nagpatnga ni ansong
'rayla napaisem tattao iti tallaong,
nagtimek iti napigsa: "ladies & gentlemen"
napataliaw addat' adayo, "kakabsat ken gagayyem.."

umis-isem timon ti taripnong
kayatna a lapdan di ammot' isasao ni ansong,
maysa met di mangikaskaso 'toy langgong
inyad-addana nga impigsa a kasla mauyong.

tumanabutob agmisuot tattao iti naimatanganda
dadduma agwang-il, kayatda a karab-asan adda't tengnga;
awanen maaramidan mangidaulo ti programa
binay-anna ida nga agsao-sao agingga a naumada.

ngem ni ansong kunam la no isut' kalaingan
iwagisna pay dagiti imana a kasla pabotosan,
nakaburod dadduma imbakalda kenkuanat' naginuman
kuna met ti sabali: "hoy, agtalnaka ken pumanawkan!"

di mabayag, maamirisen ni ansong a sabalit' naturongna
saan a dayta ti programa a nakaimbitaran-pagdiskursoanna,
iwarasna't aglawlaw, nakitabuno puro nangisit kawesda
gayam maysa a necrological services ti nakaisadsadanna.

kasta unay bain ni ansong a nagpadispensa iti bumalay
agpasken subalitda isem ti kasla aso kayatdat' pumatay,
nagbalin ngamin ti programa nga awanan mamaay
gapu't napasamak awanen ti urnos ken talinaay.

inturtured ni ansong naplanonan ti inna sawen:
"ladies & gentlemen, kakabsat ken gagayyem,
pakawanendak, porgib mi, diakto ar-aramidenen
basolko, ana pay maaramidko siakon tay nailaw-anen!"



KAKABSAT KEN GAGAYYEM
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay 
www.samiwengkenayatnirudy.blogspot.com
*nainspiraranak a nangsurat idi 11.27.2oo7 ket naadaw ti paulo ti daniw iti blog ni Roger iti Iluko.com a "Kakabsat ken Gagayyem"]