Kalgaw

[maysa a buya ti kataltalonan]

Daydi ti aldaw ti umuna a ragsak
panagkuyogta, napno't tured 
a buyogan pannakakellaat. No kua,
adda babantot; agildag nga agmalmalem
agpatpatnag iti bassit a kama, maturog
ken mangan: kasta unay ti pudotna.

Iti naminsan, agarup amin a banag
nagluom, marikna ti bara a di kabaelan
nga itured, no dadduma, agumentar
ti pul-oy ti angin; pagsalaennat' 
nakalukat ken di maitangep a tawa.

Ngem nagpukawdan. Nabayag daydin,
mariknam kadi pay pul-oy nga umagibas?
Aglanglangan a rakit ti kama; mariknak
nga agtatapawta iti adayo a lugar 
a di ammo no ania ti adda dita. 
Umuna ti init, sumaruno ti bulan-tipping.
Uray pay dagiti bato, aggunayda.
Amin a banag, makita. Marikna.

Kalpasanna nagserra ti aglawlaw nga arig 
ti kurtina. Awan makita, awan marikna. 
Naglamiis ti rabii, nagkuti ti bulong 
dagiti kayo ket naregregda iti daga. 
Tunggal maysa mariknat' pannakasinasina 
nga awan panagbabawi. Ngem nagbalintayo
nga artista iti agbaliwbaliw a tiempo--
tapno dita ken ditoy, ituloy ti agbaniaga...



KALGAW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o4.2o11