Ayat iti Pagilian

[nabulod ti ladawan]

Nupay piglat laengen a makita,
tumbog iti dara ti sugat no masinga
iti sadino man a paglinongak 
ken paginanaak. Ngem
ti gayyem-patpatgek, dina maawat
nga ayaten ti ay-ayatek; inayatna
ketdi dagiti siudad ken pagpagilian,
kinaykayatna ti nagtawtawataw.

Pinilik pagduyosan ti riknak-
kinaykayatko ti agnaed
kadagiti kataltalonan; isut' 
mangipalagip ti marka
ti kinataok, ti kinasiasinnok,
ti kinangisit ti sikok
iti ili a nakayanakan. 
Ayat iti pagilian, ayat a kalikagumak 
uray nanumo ti nagtaudak 
indatonko kenkuana ti kakaisuna a biag.

Ngem ti gayyem-patpatgek
pinalusposan, linikudanna
dagiti gameng a pamataudanna, 
diakon makita iti sidong
ken aglawlaw; ti sugat
a pinanawanna sigagalut
iti pusok gapu ta dina
inayat ti kinanumok.

Diak mababalaw, adda bukodna
a destinasion-pagturongan. Nakiro
ti lubong, ngem isut' nagayatanna.
Nagari ti pagesmanna ngem
makiddis ti pusok iti saem
gapu ta dina maako ti pagayatak--
kenkuana ti kinabaknang-dayaw,
kukuak ti agsalukag tapno ilung-aw
ti kinadaksanggasat.

Ket diak maisukat ti kinabaknang
iti pagiliak, ti sao ken wayawayak...



AYAT ITI PAGILIAN 
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[c]03.2011