Mayarig ti Agtawtawataw

[nabulod ti ladawan]


ti agtawtawataw 
mayarig kas iti 
mula a kaktus
iti disierto-- awan
maawat nga alnaab;
nalikmutan ti darat
ngem dumakkel
ken umangra nga 
agsabong ti nalabaga

aglumen ti panawen,
mapuyupoy ti tapok
ket itayab ti angin
nga ipalais iti sabali 
a disso, mapugas
ti marka ti tugot
ngem agbaniaga 
ti pakasaritaan
iti masakbayan tapno
agtalinaed iti panunot 
ken lagip kas ti pusaksak 
ti sabong a lilak

ngem no ti pusom
ken pusok maduyok
iti siit a balikas
ti daniw, dika lumdaang
ti biag mayarig
ti agtawtawataw
a mula a kaktus
iti disierto--
a mataraonan ti dara.



MAYARIG TI AGTAWTAWATAW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.o6.25.2o11.maui