Panagbaniaga

[nabulod ti ladawan: maysa a buya ti aplaya]

PANAGBANIAGA
[Panagtawataw/Exilo a Daniw]
ni Rudy Ram. Rumbaoa
[nasurat july.10.2011]
 
adayo unayen
dagiti aplaya a nagnaam
ngem patiek, subliamto met laeng
dagiti naulila a linikudam-
imbatim kaniak,
impapetpetmo iti dakulap
ti sangkapirgis a namnama ti arapaap

wen, nakaadayokan.
nakaad-adayo
ta nadanonmo payen ti sabali
nga iking ti lubong.
ngem bayat ti pannakaikawak
iti kaawanmo, sinalimetmetak dayta ayat
inimdengak ti samiweng ti dungngo
a kanayonmo a kantaen a panangilillili
ken duayyak bayat ti pannaturogko.
sapsapulek ti nalamuyot nga apros
dagiti ima a pakatalgedan ti riknak,
wenno ti nabara nga arakupmo
ta babaen kenkuana, maep-epan met
ti barukongko a napnoan iliw
gapu't nagbaetan.

diak masbaalan
diak matuokan
iti daytoy nagbaetan
ta uray adun dagiti aplaya a nagnaam,
kukuakto laeng ket bukbukodka;
agnanayonto nga asidegka kaniak.

wen, kunam nga addaka't adayo
ta saanko a masagid dagita ima,
saanko a mangngeg ti pitik 'ta pusom
wenno dika maiggaman wenno maarakup.
ngem uray kunam nga adayoka
ken adun dagiti aplaya a nagnagnaam,
asidegkanto latta nga agnanayon kaniak
ta mariknak nga agpitpitikka iti pusok
makitaka iti panunotko
mangngegka kadagiti lapayagko.

ket iti tunggal panagbannawag ti init
ken panagbaliw ti dalluyon iti taaw
tapno pugasenna dagiti tugot iti
iiyagepna iti aplaya,
agnanayonto't ayatko
agnanayon a maitalimengka iti pusok

nga uray kunam nga adayo unayen
dagiti aplaya a nagnaam,
patiek nga agsublikanto't dennak-
ti linikudam a kalman...

[copyright july.2011 by rudy ram. rumbaoa]