Tallo a Daniw

[nabulod ti ladawan]



i.
Agsaoak laeng
iti pronombre,
mangtignay a sao
dagiti banag a matagikua:
mailadawan ken maangot
kas iti kinalawa,
asul a tangatang,
ayamuom ti sabong.

ii.
Adda dita ti balikas,
ken ti musika
iti balikas

ken adda met
dagiti banag
iti tagtagainep
ken imahe.

Piliek ti maysa-
ti mismo a bagi,
ti daniw,
ti arapaap
ken realidad.

iii.
Ngem ti kakaisuna
a tarigagayko:

ti mangisao
ti balikas
para iti realidad.

Panagpitik.
Kinadalus

ken agsao 
a direkta manipud iti puso
nga agserbi para kadagiti
makangngeg
ken makaawat.



TALLO A DANIW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[c]07.08.2011