Agymanak Unay, Ama

[Emeterio T. Rumbaoa]

Nabukkaan ti bara
kas gumilgil-ayab nga apuy
ti kinupkupikopanyo a rikna
tapno madanuman ti natikagan
a bukel ni karayo.

Inimasyo ken ni Ina
ti naglangoy ken nangnanam
ti naruk-atan a diro ni ayat
iti umel a rabii.

Para kadakayo a dua
a naglemmes iti ragsak,
maysa daytoy a gameng
a sinaluadanyo kas maiparbeng...

Adtoyak ita-
ti bunga
ti nairut nga arakup
ken areng-eng
a samiweng ti nagpatnag
a nakasukogak.

A, sikat' arkitekto
a nangdisenio kaniak
tapno agbalinak a parupam-
ti kinaasinom
ken kinataom.

Kitaem,
siak ita ti siak
ta no saan a sika,
awanak ita.

Agyamanak unay, Ama
ta babaen iti panagkallaysa
ti itlog ken semilia
ti napudno nga ayat,
siak daytoy ita!



AGYAMANAK UNAY, AMA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
***Immuna a naipablaak iti June 2008 Issue ti Fil-Am Observer