Sirib ken Obra-Maestra

[Nabulod laeng ti ladawan a naaramat iti daniw]

Pinasiarnak ti walang nga espiritu 
iti maysa a rabii kalpasan pannagnak 
iti atiddog a kalsada, nakitak iti tagtagainepko 
dagiti tumatayab-- langada ti nautoyan, 
lamukosen a nagbitin iti takiagko awan 
ganaygayda, ngem apagdarikmat laeng.

Nagbaliw sukog dagiti tumatayab 
nagbalin nga ima ti maysa a dayag a kimpet
iti takiagko, nga iti likmut ti ulona napnoan 
lumabbatis a maris ti agtatapaw nga apuy 
nga iladawanna dagiti nalalawa a pagilian--

kalpasanna, nagpukaw; nagbalin a nangisit 
a buok kas iti kangisit ti uging ket naglukat 
ti bibigna a kas man adda kayatna 
nga ibaga, ibalikas wenno ikanta.

Nagpukaw ti walang nga espiritu ket nagparang 
ti maysa a babai, nakapimpintas a dayag, 
nakaub-ubing ti langana a kas ti kaippasngay
nga orkidia ket nakaay-ayat ti sabong ti rosas
a masarakan kadagiti sakaanan ti bantay ken turod.

Venus--ket ti daytoy nga aldaw, ulit-ulitek
a baliksen makaabbukay iti rikna a naganmo...


Laglagipek itutupuarmo kaniak, no ibilangnak
a pagayam. Ngem imbes a sungbatannak, 
inturongnak kadagiti bantay ken dagiti nakaun-uneg 
a teppang a nakakitaak ti napintas a buya 
ti panagtennag ti danum iti dissuor nga agturong 
iti sentro ti lubong. Wen, nagalinggagetak 
a makakita dagiti nauuneg a teppang a pumada 
iti amin a misterio- dagiti pagsiddaawan ti biag, 
nakaay-ayat ngem nakabutbuteng. 

Ket iti kasumbangir a teppang ti nalawa 
a bariwangwang, naunnatda kas lubid ti arpa 
a maipalladaw iti bantay, aduda a kas iti bugi 
ti ikan; a kaarngi ti rangtay, maipalladaw
a maisilpo iti agpada a sikigan dagiti teppang.

Kalpasan a natupakan no mano a tawen ti nalawa 
a giwang tapno agsarakta ti dayta nga aldaw 
iti asideg ti karayan, iti asideg ti atep ti lubong 
inyawatmo kaniak dagita ima ket kinunam: 
"Umayka lalaki, isurok kenka ti agsala."


Nakitak panagsalam. Nagrimat, nakarayrayray
nakaay-ayat unay a babai ket dayta nga edad 
ti kinaagtutubo umap-apuy ti mariknak, mabulsekak
a makakita iti rangrangmo a kas man ti orasion
nga ulit-uliten ti bibigko nga ibalikas: "O, Venus!"

Mangngegko ti ritmo dagiti lagip ti panagdalugudog 
ti gurruod ken napaspas a panagsuek ti kimat 
iti daga, agpitik ti pusok iti oras a panagangesko.

Manipud iti adayo, in-inut a magtengka iti labes 
ti atiddog a milia a nagdaliasatak, a masansan 
a mangyadayo kaniak manipud iti makakayaw 
a panagsalam, ti pintasmo, ti bara ti aprosmo, 
ayat nga ipug-aw manipud iti pusom.

O, Venus, sabongka a pinili ti nakaparsuaan!


Kalpasanna, nagtugawta ken imminum 
iti makasalibukag nga itsa, nangan iti nasam-it 
nga ubas manipud iti inted ti tangatang
ket naibukbok iti daga ti tubbog ti sandia- 
kadagiti bambantay ken dagiti turod; 
ken uray pay kadata, ket ti ragsak ti bibig, 
panagkatawa ken kinasirib nga agsao
ken ti kaadda ti kappia ken ulimek bayat
panangkitak kenka-- makaay-ayo ti panagsala 
ti sabong. Iti amin nga adda ti labes kadata,
ti puraw nga abungot a naiputipot iti sugat 
dagiti ulo ken dagiti naidaklan a fuerte ti pasdek
a mangwanawan ken salaknib a nangipasangay
ti puraw a nagtagipayak nga espritu a naipalad 
a mangpasiar kaniak, napnuan pagsidsiddaawan 
ngem maawatak dagiti balikas a naisawang
ti rinibribu a tawen ti napalabas-

Nakakaskasdaaw ti lubong, Pagayamko,
daytoy ti sirib ken obra-maestra ti Dios!

SIRIB KEN OBRA-MAESTRA 

Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o5.2o12]

[copyright.by.rudy.ram.rumbaoa]