Kailiwko

[Nabulod laeng ti ladawan a naaramat]


Kailiwko ti sabongmo a rosas
iti nalamiis ken nasipnget a rabii,
iti umel a daga nga idi nagkari kaniak
ti panagpusaksak, rag-o ken rimat;

ngem pimmusayda iti naglukongan
ti lima, nagtubo dagiti tanem iti agrupsa
a kataltalonan a nanglikmut kaniak.
Sikat' anaraar ti lawag ti bulsek a lubong,

ket bayat ti apagdarikmat a pannakisarang 
kaniak ni patay iti patibulo, aniat' nabati
a banagen dagiti nakurapay nga agalla-alla?
Angin kadi a naparpardas ngem ti kimat?

Manen, kailiwko ti sabongmo. Ti langto
dagiti nangato ken nailangitan a pagtaengan,
iti galangugong ti baybay ken ayamuom
a banglo a maipalais iti arubayan, ngem adayoka.

Ket agingga a di maigalut ti lamiis ken sipnget
ti rabii, kailiwko ti sabongmo a rosas, agingga 
a mabartekak iti arak, agingga a magnaak
iti katapokan- kailiwka latta.



KAILIWKO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o7.2o12